पत्नीला मारहाण करुन खून करणाऱ्या नराधम पतीला अटक

मडगाव: पत्नीला बेदम मारहाण करून तिचा खून करण्याचा आरोप असलेल्या पती सागर तिंबाडीया (Sagar Timbadiya) (29) याला आज सकाळी मडगाव पोलिसांनी (Margao Police) अटक केली. या प्रकरणी सागर याच्यावर खुनाचा आरोप दाखल केला आहे. या प्रकरणी पोलीस निरीक्षक दितेंद्र नाईक (Ditendra Naik) हे तपास करीत आहेत. रावणफोंड येथील नालंदा अपार्टमेंटमध्ये 10 डिसेंबर रोजी रात्री हा प्रकार घडला होता. अस्त्याव्यस्थ परिस्थितीत पत्नीला रात्री बाराच्या सुमारास जिल्हा इस्पितळात (District Hospital) आणले असता तिला मृत घोषित करण्यात आले होते. बाळाचे कपडे धुण्यासाठी बाथरुममध्ये गेली असता ती जिन्यावरून खाली पडून ती जखमी झाल्याचा बनाव सुरवातीला तिचा पती सागर याने केला होता.

मात्र मृतदेहाची उत्तरीय तपासणी केली असता मयताच्या अंगावर 40 पेक्षा जास्त जखमा सापडल्याने तसेच सहा ठिकाणी चावे घेतल्याचे आढळून आल्याने मारहाण झाल्याने तिला मृत्यू आल्याचे निदर्शनास आल्यानंतर उपजिल्हाधिकारी प्रसाद वळवईकर (Prasad Valvaikar) यांच्या तक्रारीवरून काल रात्री मडगाव पोलिसांनी खुनाचा गुन्हा नोंद केला होता.