CM प्रमोद सावंत यांनी शब्द पाळला, मडगावच्या निवृत्त होमगार्ड महिलेला दोन लाखांची मदत सुपूर्द

मडगाव: पावसामुळे घर कोसळलेल्‍या माजी होमगार्ड विमल शिरोडकर यांना आज दक्षिण गोवा जिल्‍हा प्रशासनाकडून मदत म्‍हणून दोन लाख रुपयांचा धनादेश सुपूर्द करण्‍यात आला. दक्षिण गोव्‍याचे अतिरिक्‍त जिल्‍हाधिकारी उदय प्रभुदेसाई यांनी स्‍थानिक आमदार दिगंबर कामत यांच्‍या उपस्‍थितीत हा धनादेश शिरोडकर यांच्‍याकडे सुपूर्द केला.

शिरोडकर यांना दोन लाखांची तत्‍काळ मदत दिली जाईल, असे यापूर्वी मुख्‍यमंत्री डॉ. प्रमाेद सावंत यांनी विधानसभेत जाहीर केले होते. त्‍यानुसार आज हा धनादेश देण्‍यात आला, अशी माहिती आमदार दिगंबर कामत यांनी दिली. शिरोडकर यांचे पक्‍के घर उभे करून देण्‍याचा प्रयत्‍न आहे, असे त्‍यांनी सांगितले. यावेळी सासष्टीचे मामलेदार प्रतापराव गावकर हेही उपस्‍थित होते.