मुरगाव शिगमोत्सव समितीतर्फे गुलालोत्सव

वास्को: मुरगाव शिगमोत्सव समितीतर्फे गुलालोत्सव उत्साहात साजरा करण्यात आला. वास्कोत श्री दामोदर चरणी गुलाल वाहिल्यानंतर गुलालोत्सव म्युझिक, बॅण्डबाजा, ऑर्केस्ट्राने वास्को शहरात मिरवणूक काढून साजरा करण्यात आला. नागरिकांनी गाण्यांच्या तालावर ठेका धरला. प्रत्येक वाड्यावर लहान मुलांबरोबर महिलाही गुलालोत्सवात सहभागी झाल्या होत्या. ग्रामदैवत श्री दामोदर चरणी गुलाल वाहिल्यानंतर मुरगाव शिगमोत्सव समितीतर्फे धुळीवंदनाला सुरवात झाली.

वास्कोचे नवनिर्वाचित आमदार दाजी साळकर तसेच मुरगावचे आमदार संकल्प आमोणकर यांनीही धुलीवंदनात आपला सहभाग दर्शवला. त्यांच्या उपस्थितीत श्री दामोदर चरणी गुलाल अर्पण केला. यावेळी त्यांच्यासमवेत मुरगाव शिगमोत्सव नागरी समितीचे अध्यक्ष विजय नागवेकर, सरचिटणीस नितीन चोपडकर, सल्लागार मनेष आरोलकर, सचिव संतोष केरकर, उपाध्यक्ष सुदेश भोसले, प्रभाकर मुळीक, शेखर कळंगुटकर, खजिनदार रिमा सोनुर्लेकर व नागरिक मोठ्या संख्येने उपस्थित होते. पुरोहितांमार्फत श्रीचरणी गान्हाणे घातल्यानंतर धुलीवंदनाच्या कार्यक्रमाला सुरवात झाली.