Goa News: जाहिरात फलक कोसळल्‍याने शेतीची नासाडी

धारगळ पंचायत क्षेत्रातील राष्ट्रीय महामार्ग ६६ महाखाजन येथील शेतात मोठमोठे होर्डिंग लावण्यात आले होते. जोरदार वाऱ्या-पावसामुळे ते सध्‍या जमीनदोस्त झाले आहेत. त्‍यामुळे शेतीची नासाडी झाली आहे.

या जाहिरात फलकांमुळे धारगळ पंचायतीला वर्षाला महसूल मिळतो. फलकामागे किमान ३० ते ३५ हजार रुपये वर्षाला पंचायतीला मिळतात.

राष्ट्रीय महामार्ग ६६ महाखाजन-धारगळ येथे मोठ्या प्रमाणात भातशेती आहे. या शेताच्या मधूनच राष्ट्रीय महामार्ग जातो. शेतकरी दरवर्षी भातशेतीबरोबरच उन्हाळ्यात भुईमूग, मिरच्या, हळसांदे व पालेभाज्यांचे उत्‍पादन घेऊन आपला उदरनिर्वाह करतात.

परंतु या शेतकऱ्यांवर त्‍यांच्‍या जमिनीत जाहिरात फलक लावण्‍यासाठी काही पंचसदस्‍य दबाव आणतात, कारण त्‍या-त्‍या कंपन्‍यांकडून ‘अर्थपूर्ण’ सौदा झालेला असतो. शिवाय पंचायतीलाही महसूल मिळतो. स्‍वत:च्‍या स्‍वार्थासाठी काही पंच शेतकऱ्यांचा बळी देत आहेत, असा आरोप आता होऊ लागला आहे.

शेतजमीन पडीक; लाखोंचा व्‍यवहार

मोपा आंतरराष्ट्रीय विमानतळ आणि तेथे येणारे प्रकल्पांबाबत मोठमोठ्या जाहिराती या फलकांवर दिसून येतात. त्यामुळे त्या-त्‍या कंपनीकडून काही दलाल परस्पर लाखो रुपये वसूल करतात. पंचायतीला मात्र अल्प महसूल मिळवून दिला जातो. शेतीची नुकसानी झाली तरी त्‍या कंपन्‍यांना किंवा दलालांना किंवा पंचांना काहीच पडलेले नाही. या राष्ट्रीय महामार्गावरून येणाऱ्या-जाणाऱ्या लोकांना, वाहनचालकांना जाहिरात फलक ठळकपणे दिसावेत, हाच त्‍यांचा हेतू असतो. विशेष म्‍हणजे हे फलक लावण्‍यासाठी शेतजमीन पडीक ठेवण्‍याचे प्रकारही वाढले आहेत.

अर्जुन कानोळकर, सरपंच

प्रत्‍येक जाहिरात फलकामुळे ग्रामपंचायतीला वर्षाकाठी महसूल मिळतो. जे दोन भलेमोठे फलक पडलेले आहेत, त्यामुळे शेतीची नुकसानी झालेली आहे. नुकसानग्रस्‍त शेतकऱ्यांना कंपनीने योग्य तो मोबदला दिला आहे.