Goa Monsoon Aid : घर पडून निधन झालेल्या युवकाच्या कुटुंबीयांना ४ लाखांची मदत : विजय सरदेसाई

सासष्टी, ताळसांझर, आके, मडगाव येथे काही दिवसांपूर्वी घर कोसळून निधन झालेल्या युवकाच्या कुटुंबीयांना सरकारतर्फे ४ लाख रुपये देण्यात येतील, असे फातोर्ड्याचे आमदार विजय सरदेसाई यांनी जिल्हाधिकारी व इतर प्रशासकीय अधिकऱ्यांसमवेत शनिवारी या भागाची पाहणी केल्यानंतर सांगितले.

त्या कुटुंबाला घर बांधून दिले जाईल, असेही सरदेसाई यांनी सांगितले.

ताळसांझर भागात अनेक मातीची घरे आहेत व ही घरे मूळ गोंयकारांची आहेत. त्यांना घरापर्यंत येण्यासाठी रस्ता नाही. तरी त्यांना पायऱ्या बांधून दिल्या जातील व जी धोकादायक झाडे आहेत ती कापली जातील, असेही त्यांनी सांगितले.

स्थानिक नगरसेविका निमिशा फालेरो धोकादायक झाडांची निवड करून जिल्हा प्रशासनाला त्याबद्दल कळविणार आहेत. ताळसांझर परिसर हा मडगाव कोमुनिदादच्या मालकीचा असून त्यात दीडशेपेक्षा जास्त बेकायदा घरे असल्याचे कोमुनिदादचे ॲटर्नी सेलेस्टीन नोरोन्हा यांचे म्हणणे आहे.

ही घरे पाडण्यासाठी कोमुनिदादने आदेश दिले असले तरी सध्या हे प्रकरण न्यायप्रविष्ट आहे. ही सर्व घरे धोकादायक स्थितीत असून त्यातून काहीही बरेवाईट होऊ शकते. त्यासाठी वेळीच उपाययोजना करणे आवश्यक असल्याचे नोरोन्हा यांचे म्हणणे आहे.

कही लोकांनी इथे बेकायदेशीर घरे बांधून ती भाड्याने दिली आहेत. पालिकेने याचीही दखल घेणे आवश्यक असल्याचे नोरोन्हा यांचे म्हणणे आहे.