Goa Monsoon Update: शुक्रवारी, शनिवारी गोव्यात तुरळक ठिकाणी मुसळधार पावसाची शक्यता

Goa Monsoon Update: गोव्यात शुक्रवारी आणि शनिवारी (दि. 30 / 01) तुरळक ठिकाणी मुसळधार पावसाची शक्यता आहे. वादळी वाऱ्यासह उत्तर आणि दक्षिण गोव्यातील काही भागात मुसळधार पाऊस पडेल अशी शक्यता गोवा हवामान खात्याने वर्तवली आहे. मागील दिवसांत गोव्यात काही भागात हलका ते मध्यम स्वरूपाच्या पावसाची नोंद झाली आहे.

आज राज्यातील अनेक भागांत हलक्या ते मध्यम सरी पडल्या. कोणकोण, सांगे, मुरगाव, दबोळी, केपे आणि पेडणे परिसरात पावसाची नोंद झाली.

गोवा हवामान खात्याने प्रसिद्ध केलेल्या अहवालानुसार, आज (दि.30 सप्टेंबर) आणि उद्या (दि.01 ऑक्टोबर) रोजी गोव्यात तुरळक ठिकाणी वादळी वाऱ्यासह मुसळधार पाऊस पडेल. तसेच 02, 03 आणि 04 ऑक्टोबर रोजी देखील काही ठिकाणी हलक्या ते मध्यम स्वरूपाच्या सरी कोसळतील. किनारपट्टी भागात 75 कि.मी प्रतितास वेगाने वारे वाहण्याची शक्यता आहे असे हवामान खात्याने म्हटले आहे.

परतीचा मान्सून (Monsoon Return Journey) एक आठवड्यापासून लांबणीवर पडला आहे. देशातून पंजाब, दिल्ली, हिमाचल प्रदेश, पश्चिम उत्तर प्रदेश, हरियाना, चंडीगडसह वायव्य भारतातील बहुतांशी भागातून मॉन्सून परतला आहे. आज कोकण, मध्य महाराष्ट्र, मराठवाडा आणि पूर्व विदर्भातील अनेक भागांत हलक्या ते मध्यम स्वरुपाच्या सरी पडल्या. कोकणातील सिंधुदुर्ग, रत्नागिरी, रायगड आणि पालघर या जिल्ह्यांमध्ये ठिकठिकाणी पावसाच्या सरी पडल्या.