Bicholim Rain: डिचोलीत पावसाचा कहर सुरूच

डिचोली: डिचोलीत गेल्या सहा दिवसांपासून पावसाचा कहर सुरूच असून आज रविवार 11 सप्टेंबर रोजी देखील डिचोलीत सर्वत्र पर्जन्यवृष्टी झाली. सकाळी पावसाचा जोर होता. दिवसभर आकाशात काळेकुट्ट ढगही दाटून आले होते. सलग सहा दिवसांपासून पडणाऱ्या पावसामुळे जनजीवनावरही परिणाम जाणवत आहे.

(heavy rain reported in Bicholim )

चतुर्थी सणात विश्रांती घेतल्यानंतर गेल्या मंगळवारपासून पावसाची बरसात सुरू झाली आहे. अधूनमधून जोरदार पर्जन्यवृष्टीही होत आहे. सलग सहा दिवस पडलेल्या पावसामुळे सखल भागात पाणी साचले असून डिचोलीसह साखळीतील वाळवंटी नदीच्या पातळीत वाढ झाली आहे. पावसाचा तडाखा चालूच राहिल्यास नद्यांचे पाणी बाहेर पडण्याची शक्यता आहे.

दरम्यान, पावसाचा कहर सुरु असला, तरी किरकोळ अपवाद वगळता पावसामुळे मोठी वित्तहानी किंवा अनुचित प्रकार घडलेला नाही, अशी माहिती डिचोली अग्निशमन दलाकडून मिळाली आहे. असे असले तरी हवामान विभागाने काल वर्तवलेल्या अंदाजावरुन येत्या तीन दिवसात पावसाचा जोर कायम राहणार असल्याने डिचोलीसह राज्यातील नागरिकांना बाहेर पडताना पावसाचा अंदाज घेतच आपले नियोजन आखावे लागणार आहे.