भिंत खचली, चूल विझली, होते नव्हते गेले! शिवोलीत 70 वर्षीय महिला बेघर, मुसळधार पावसात घर कोसळले

House Collapsed In Siolim

म्हापसा: काही वर्षांपूर्वी पतीचे निधन, दोन हजार रुपयांचे महिन्याला निवृत्त वेतन आणि दुसरा कोणताही आधार नाही. अशात डोक्यावरचा निवारा देखील मुसळधार पावसाच्या तडाख्यात कोसळला.

शिवोलीत ७० वर्षीय महिलेवर बेघर होण्याची वेळ आली आहे. गोव्यात गेल्या काही दिवसांपासून सुरु असलेल्या मुसळधार पावसात या महिलेचे माती घर पूर्णत: जमीनदोस्त झाले आहे

प्रेमावती वेर्णेकर (७०, शिवोली) असे या महिलेचे नाव आहे. गोव्यात गेल्या आठवड्यापासून मान्सून पुन्हा सक्रिय झाला आहे. सततच्या पावसामुळे राज्यात विविध ठिकाणी पडझडीच्या घटना घडत आहेत.

उत्तर गोव्यात देखील देखील सततच्या पावसाचा फटका बसला. शिवोलीत प्रेमावती वेर्णेकर यांचे घर वादळी वाऱ्यासह सुरु असलेल्या मुसळधार पावसात कोसळले. जुन्या ढाच्यातले मातीचे घर पावसात कोसळल्याने महिलेवर बेघर होण्याची वेळ आली आहे.

७० वर्षीय महिलेच्या पतीचे गेल्या काही वर्षापूर्वी निधन झाले होते. दोन हजार रुपयांचे मिळणारे निवृत्त वेतन या पलिकडे कोणताही आधार नसणाऱ्या महिलेचे डोक्यावरचे छत देखील कोसळल्याने महिला हतबल झाली आहे.