पूजा शर्मा हाजीर हो! अटकपूर्व जामीन मंजूर पण चौकशी अटळ, SIT समोर हजर राहण्याचे आदेश

आसगाव येथे प्रदीप आगरवाडेकर यांचे घर मोडण्याचा प्रयत्न केल्याच्या प्रकरणातील संशयित पूजा शर्मा हिला सोमवारी (ता. २२) गुन्हे अन्वेषण विभागाने स्थापन केलेल्या विशेष तपास पथकासमोर चौकशीसाठी उपस्थित राहावे लागणार आहे.

मुंबई उच्च न्यायालयाच्या गोवा खंडपीठाने पूजा हिला अटकपूर्व जामीन मंजूर करताना ही अट घातली आहे. पूजा हिला अटक केली तर तिची ५० हजार रुपयांच्या जामिनावर मुक्तता करावी, असेही न्यायालयाने अटकपूर्व जामीन अर्जावर दिलेल्या निवाड्यात म्हटले आहे.

आसगाव येथील ६०० चौरस मीटर जमीन पूजा हिने खरेदी केली आहे. त्या जमिनीत असलेले घर पाडण्याचा तिने प्रयत्न केल्याचा आरोप आहे.

प्रदीप यांची पत्नी प्रिंशा हिने आपल्या मुलाचे व पतीचे अपहरण झाले होते, तसेच आपले घर मोडण्याचा प्रयत्न झाला, अशी पोलिस तक्रार केली होती. त्यानंतर ही तक्रार मागे घ्यायची आहे, असे लेखी स्वरूपात तिने पोलिसांना कळविले. मात्र, एफआयआर दाखल झाल्याने न्यायालयाच्या परवानगीविना तपासकाम थांबवणे पोलिसांना शक्य झाले नाही.

सरकारने या प्रकरणी तपासकाम सुरू ठेवण्याचा निर्णय घेतला. पोलिस अटक करतील, या भीतीने पूजा हिने जिल्हा सत्र न्यायालयात अटकपूर्व जामिनासाठी अर्ज केला. तो तेथे नामंजूर झाला शिवाय तिच्या कोठडीतील चौकशीची गरज न्यायालयाने व्यक्त केली होती. या निवाड्याला तिने उच्च न्यायालयात आव्हान दिले होते.