व्हेंझी व्हिएगस यांच्या धिरयो विधेयकाला वाढता पाठिंबा

मडगाव : बैलांच्या झुंजींना (धिरयो) पारंपरिक खेळ या व्याख्येत बसवून त्यांना कायदेशीर स्वरूप देण्यासाठी बाणावलीचे आमदार व्हेंझी व्हिएगस यांनी जे खासगी विधेयक मांडले आहे, त्याला फातोर्ड्याचे आमदार विजय सरदेसाई तसेच मांद्रेचे आमदार जित आरोलकर यांनीही आपला पाठिंबा जाहीर केला आहे.

या विधेयकाला आपला पाठिंबा असल्याचे जाहीर करताना जर तामिळनाडूत जलीकुट्टी ही बैलांची शर्यत पारंपारिक खेळ होऊ शकते, तर गोव्यात धिरयो का होऊ शकत नाही असा सवाल विजय सरदेसाई यांनी केला आहे.

तामिळनाडू सरकारने जसे सर्वोच्च न्यायालयाला आपले म्हणणे पटवून दिले, त्याप्रमाणे गोवा सरकारनेही आपली बाजू पटवून द्यायला पाहिजे. त्यासाठी सरकारला इच्छाशक्ती असणे गरजेचे आहे, असे ते म्हणाले.

आज सरदेसाई याना पाठिंबा देण्यासाठी विधानसभा संकुलात धिरयो आयोजक मोठ्या प्रमाणावर हजर होते. सासष्टी, तिसवाडी व पेडणे या तीन तालुक्यात या झुंजी लोकप्रिय असून सर्वोच्च न्यायालयाने बंदी घातलेली असतानाही त्यांचे बेकायदेशीररित्या आयोजन केले जात आहे. पेडणे तालुक्यात मांद्रे येथे हा प्रकार विशेष लोकप्रिय असून त्यासाठी आरोलकर यांनीही या विधेयकाला आपला पाठिंबा जाहीर केला आहे.

या झुंजी आयोजित करताना बैलांच्या शिंगांना टोपण लावून त्यांना इजा होण्यापासून वाचवता येणे शक्य आहे, असे सरदेसाई म्हणाले.