Panjim: धान्यसाठा घोटाळा प्रकरण; बोरकरने घेतला अर्ज मागे

Panjim: नागरी पुरवठा खात्याच्या गोदामातील धान्यसाठा घोटाळा प्रकरणी गुन्हे शाखेने जप्त केलेल्या सुमारे 1.044 पोती धान्याच्या विक्रीसाठी जिल्हाधिकाऱ्यांनी दिलेल्या आदेशाला संशयित सचिन नाईक बोरकर याने पणजी जिल्हा व सत्र न्यायालयात आव्हान दिले आहे. त्यावरील सुनावणीवेळी काल हा अर्ज तांत्रिक कारणावरून बोरकर याने अर्ज मागे घेतल्याने अतिरिक्त सत्र न्यायालयाने तो निकालात काढला.

नव्याने अर्ज दक्षिण न्यायालयात सादर केला जाणार आहे. संशयित बोरकर याच्याविरुद्ध गुन्हे शाखेने दाखल केलेल्या सर्व प्रकरणांमध्ये त्याला सशर्त जामीन मिळाला आहे. पोलिसांनी जो धान्यसाठा जप्त केला, तो नागरी पुरवठा खात्याच्या गोदामातील नव्हता, हे यापूर्वीच सरकारने मान्य करून खात्याला क्लिन चीट दिली आहे.

त्यामुळे हा धान्यसाठा स्वस्त धान्य दुकानधारकांकडून त्याने घेतला असल्याचा संशय पोलिसांनी व्यक्त करत पुढील तपास सुरू केला असला तरी अजून त्यातही ठोस पुरावे मिळू शकलेले नाहीत.

दरम्यान, संशयिताविरुद्ध क्राईम ब्रँचने तीन वेगवेगळे गुन्हे नोंद केले होते. हे गुन्हे दक्षिण गोवा क्षेत्रातील असल्याने उत्तर गोवा सत्र न्यायालयाने अर्जदाराला तेथे अर्ज सादर करावेत अन्यथा अर्ज फेटाळण्यात येईल, असे स्पष्ट केले.

तांत्रिक कारणावरून अर्जदाराच्या वकिलांनी तो मागे घेत असल्याचे स्पष्ट केले. दक्षिण गोव्यात उद्या नव्याने तीन वेगवेगळ्या प्रकरणांत धान्यसाठा परत करण्याच्या मागणीसाठी अर्ज केले जाणार आहेत.

गुन्हे शाखेने जप्त केलेल्या धान्य साठ्याची नासाडी होऊ नये म्हणून उत्तर गोवा जिल्हाधिकाऱ्यांनी त्याची विक्री करण्याचे निर्देश दिले आहेत. पोलिसांनी नागझर, कुर्टी व बोरी येथील खासगी गोदामांतून सुमारे 10 लाखांचा धान्यसाठा जप्त केला आहे.