'Cash For Job' चे आणखी एक प्रकरण! शिक्षण खात्यात नोकरीच्या आमिषाने महिलेची फसवणूक; संशयितास अटक

Cash For Government Job Scam

वास्को: शिक्षण खात्यात सरकारी नोकरी देण्याच्या बहाण्याने नवेवाडे येथील एका महिलेची ४. लाख ३० हजार रुपयांची फसवणूक केल्याप्रकरणी संशयित गोविंद मांजरेकर (वय ४२ वर्षे) याला वास्को पोलिसांनी आज सायंकाळी अटक केली. दुसरा संशयित सूरज नाईक फरार असून त्याचा शोध सुरू असल्याचे पोलिसांनी सांगितले.

नवेवाडे येथील साक्षी सुदर्शन केरकर (वय ३९ वर्षे) यांनी दिलेल्या तक्रारीनुसार, संशयित गोविंद मांजरेकर आणि सूरज नाईक (दोघेही रा. वास्को) यांनी केरकर यांना शिक्षण खात्यात ‘एमटीएस’ पदाची नोकरी देण्याचे आमिष दाखवून त्यांच्याकडून पैसे घेतले; परंतु नोकरी मिळाली नाहीच, शिवाय पैसेही परत न मिळाल्याने साक्षी यांनी पोलिसांत धाव घेतली.

वास्को पोलिसांनी सांगितले की, याप्रकरणी शनिवारी (ता. ९) रात्री उशिरा गुन्हा नोंद केला आहे. साक्षी केरकर यांना गोविंद आणि सूरज यांनी १ मार्च ते ३१ मे २०२३ या कालावधीत शिक्षण विभागात नोकरी देण्याची आमिष दाखवून त्यांच्याकडून ४ लाख ३० हजार रुपये घेतले होते. मात्र, नोकरीही दिली नाही आणि त्यांचे पैसेही परत केले नाहीत. अखेर तक्रार नोंदविल्यानंतर पोलिसांनी गोविंद आणि सूरज यांच्याविरुद्ध गुन्हा नोंदविला.

वास्कोचे पोलिस निरीक्षक कपिल नायक यांच्या मार्गदर्शनाखाली उपनिरीक्षक कॅरी फर्नांडिस या प्रकरणाचा अधिक तपास करीत आहेत.