Codar IIT Project: 'गावात आयआयटी नकोच'! गावडेंचा कोडारवासीयांना पाठिंबा; विषय मुख्यमंत्र्यांपर्यंत नेणार असल्याची दिली माहिती

फोंडा: कोडार-बेतोडा येथील नियोजित आयआयटी प्रकल्पाला विरोध वाढत असतानाच आता प्रियोळ मतदारसंघाचे आमदार गोविंद गावडे यांनी कोडार गावाला भेट देऊन त्यांच्या समस्या जाणून घेतल्या.

दोन दिवसांपूर्वी कोडारवासीयांनी आमदार गोविंद गावडे यांची भेट घेऊन त्यांच्याशी आयआयटीसंबंधी चर्चा केली होती. गोविंद गावडे यांनी कोडारवासीयांना पाठिंबा देताना हा विषय आपण मुख्यमंत्र्यांपर्यंत नेणार असल्याचे सांगितले.

कोडार-बेतोडा गाव हा निसर्गसंपन्न असून येथील शेतीबागायतीवरच लोक गुजराण करतात. या गावाची नैसर्गिक समृद्धी अबाधित ठेवण्यासाठी धडपडणाऱ्या ग्रामस्थांचा विषय आपण सरकार दरबारी लावून धरू, असेही गोविंद गावडे म्हणाले.

यावेळी गोविंद गावडे यांना कोडारवासीयांनी एक निवेदन सादर केले. त्यात कोडार गावात आयआयटी नकोच, असा उल्लेख केला आहे. यावर गोविंद गावडे यांनी कोडारवासीयांना पाठिंबा जाहीर केला.

आदिवासींसाठी ‘उटा’ कार्यरत

विशेष म्हणजे ‘उटा‘ संघटनेचा पूर्ण पाठिंबा आदिवासी बांधवांना असेल. आदिवासी समाजाच्या उत्कर्षासाठी ‘उटा’ संघटना कार्यरत असून या संघटनेच्या माध्यमातून कोडारवासीयांच्या पाठीशी ठामपणे उभा राहणार असल्याचेही गोविंद गावडे म्हणाले.