वेरे-वाघुर्मे, वळवईत नवीन जलवाहिनीचा शुभारंभ; बेरोजगारी दूर करण्यासाठी सरकार प्रयत्नशील - गोविंद गावडे

सावईवेरे : मुर्डी भागात म्हादई नदीवर 108 कोटी रुपये खर्चाची योजना असून तेथे बंधाऱ्याचे काम सुरू आहे. शितोळ तळ्याच्या प्रकल्पासाठी साळगावकरकडून 2700 चौ. मी. जागा मोफत मिळाली असून या प्रकल्पासाठी 27 कोटी रुपये खर्च होणार आहे. विकासकामांसह या भागात पर्यटकांना आकर्षित करून बेरोजगारी दूर करण्यासाठी सरकार प्रयत्नशील आहे, अशी माहिती प्रियोळचे आमदार तथा क्रीडा, कला व संस्कृती मंत्री गोविंद गावडे यांनी दिली.

वेरे-वाघुर्मे ग्रामपंचायत क्षेत्रातील कावंगाळ, मधलावाडा, कोणिर-सावई ते घाणो तसेच वळवई ग्रामपंचायत क्षेत्रात सुमारे 5 कोटी रुपये खर्चून पाणीपुरवठ्यासाठी पाण्याची नवीन जलवाहिनी घालण्यात येणार आहे. त्याचा शुभारंभ सोहळा वेरे-वाघुर्मे पंचायतीच्या प्रांगणात संपन्न झाला.

यावेळी गावडे बोलत होते. व्यासपीठावर उपसरपंच बाबू गावडे, पंच अक्षय नाईक, रोहन तारी, नवनाथ वेलकासकर, लोचन नाईक, स्वाती पालकर, हर्षा गावडे, पाणी खात्याचे सहाय्यक अभियंता जांबावलीकर आदी उपस्थित होते. मंत्र्यांच्या हस्ते नामफलकाचे अनावरण करून जलवाहिन्या घालण्याचा शुभारंभ सोहळा पार पडला.

मान्यवरांची उपस्थिती

शुभारंभ सोहळ्याला कुर्टी जि. पं. सदस्या प्रिया चारी, जि. पं. सदस्य श्रमेश भोसले, सरपंच शोभा पेरणी, वळवई सरपंच विनायक वेंगुर्लेकर, तिवरे सरपंच जयेश नाईक आदी मान्यवर हजर होते. सूत्रसंचालन दीपक वेलकासकर यांनी तर बाबू गावडे यांनी आभार मानले.