पणजी : आदिवासी समाजाच्या भल्यासाठी, प्रगतीसाठी मी मंत्री या नात्‍याने सदैव कटिबद्ध आहे. रमेश तवडकर आणि माझ्यात कोणतेही मतभेद नाहीत. तवडकरांना मी आपला मोठा भाऊ मानतो, असे कला व संस्कृती मंत्री गोविंद गावडे यांनी सांगितले. ‘सडेतोड नायक’ कार्यक्रमात गुरुवारी त्यांनी एसटी राजकीय आरक्षणापासून अन्‍य विषयांवर भाष्‍य केले.
गावडे म्हणाले, पुढील ५ वर्षांत राजकीय आरक्षण मिळेल याची मला खात्री आहे. प्रकाश वेळीप हे खूप ज्येष्ठ असून त्यांनी एसटी समाजाच्या भल्यासाठी मोठ्या प्रमाणावर काम केले आहे. जे लोक प्रकाश वेळीप यांच्यावर टीका करत आहेत ते त्यांच्या वैयक्तिक स्‍वार्थातून! उटा सर्वसमावेशक नसल्याचा आरोपही गावडेंनी नाकारला. आंदोलनादरम्यान मरण पावलेल्या दोन तरुणांच्या प्रकरणाबाबत विचारले असता गावडे म्हणाले, की या प्रकरणाबाबत न्यायालयात अपील करण्यासाठी आम्ही राज्य सरकारवर दबावही आणला आहे. या प्रकरणी न्यायालयात अपील करणे हे राज्य सरकारचे कर्तव्य होते.
मी सदैव एसटी समाजाच्या पाठीशी
कला आणि संस्कृती विभागात सुमारे १८५ नोकऱ्यांच्या जागा जाहीर करण्यात आल्या आहेत. ही सर्व पदे भरण्यात आली असून कोणताही अनुशेष शिल्लक नाही. भाजप सरकारच्‍या कार्यकाळातच आम्हाला एसटीचा दर्जा मिळाला आहे, हे एसटी समाजातील सालसेत येथील जनतेला सांगायचे आहे, असे मंत्री गोविंद गावडे म्हणाले. वैद्यकीय विभागातील बहुसंख्य एसटी राखीव जागा सालसेतमधून एसटी समाजाला मिळाल्या आहेत. या समाजावर होणाऱ्या अन्यायाविरुद्ध एसटी समाजाच्या पाठीशी मी सदैव आहे.
आदिवासी कल्याण खाते त्या समाजाकडेच हवे
आदिवासी कल्याण खाते मुख्यमंत्र्यांकडे ठेवण्यामागे काही राजकारण आहे का? असा सवाल केला असता गावडे म्हणाले, ‘मला माहीत नाही, हा प्रश्न तुम्ही मुख्यमंत्र्यांना विचारावा. माझ्या कारकिर्दीत मी कोणाचे पाय खेचले नाहीत आणि भविष्यातही तसे करणार नाही. माझ्या मते हा विभाग आदिवासी समाजातील व्यक्तीला द्यायला हवा म्हणजे तो त्या समाजाला न्याय देईल.’
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.