गेली अनेक वर्षे भिजत पडलेला सोनसोडोचा प्रश्‍‍न आता लवकरच सोडविण्यात येईल. तसेच माकाझन येथील कुष्ठरोग इस्पितळ जागेत शैक्षणिक हब (Education Hub) उभारण्‍यात येईल, असे आश्‍‍वासन मुख्यमंत्री डॉ. प्रमोद सावंत (Pramod Sawant) यांनी दिले. सोनसोडोच्या दैनावस्थेस कुडतरी तसेच फातोर्ड्याचे आमदार जबाबदार असल्याचा आरोपही त्‍यांनी केला आहे. (Government will build Education hub in Macazana says goa chief minister Pramod Sawant)
कुडतरीचे माजी जिल्हा पंचायत सदस्य मोरेन रिबेलो यांनी काल शुक्रवारी सकाळी काँग्रेस पक्षाचा त्याग केला व सायंकाळी भाजपमध्‍ये प्रवेश केला. यावेळी आयोजित कार्यक्रमात मुख्यमंत्री बोलत होते. ते म्‍हणाले की, सोनसोडोप्रश्‍‍नी दोन्‍ही आमदारांनी फक्त निवेदनेच केली. येथील कब्रस्तानला अडथळा आणण्यासही तेच कारणीभूत आहेत. आपण यापूर्वी कुडतरी प्राथमिक केंद्राचा दर्जा उंचावण्याचे वचन दिले होते व ती प्रक्रिया सुरू झालेली आहे, शैक्षणिक हबबाबतही पावले उचलली गेली आहेत. आपले सरकार हे काम करणारे आहे व विविध ठिकाणी सुरू असलेली कामे ही त्याचीच उदाहरणे आहेत असेही मुख्‍यमंत्र्यांनी नमूद केले.
भाजप गेली दहा वर्षे सत्तेत आहे. या काळात कधीच गोव्यातील जनतेत जात-धर्माच्या नावावर सरकारने भेदभाव केलेला नाही असे सांगून येत्या निवडणुकीत कुडतरीतील लोकांनी भाजप उमेदवाराला निवडून द्यावे व विकासाची दारे खुली करावीत, असे आवाहन मुख्‍यमंत्र्यांनी केले. ‘भाजप नको’ असे लोकांना सांगून येथून आजवर अनेक आमदार व खासदार झाले, पण ते विकास करू शकले नाहीत. मात्र यावेळी ते चित्र बदला व विकासाला प्राधान्‍य द्या, असेही ते म्‍हणाले.
यावेळी भाजप प्रदेशाध्‍यक्ष सदानंद शेट तानावडे, पंचायतमंत्री माविन गुदिन्हो, आमदार क्लाफास डायस आणि मान्‍यवरांची उपस्थिती होती.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
