Taleigao: छत काढले दुरुस्तीला, पावसाने दिला तडाखा; ताळगाव प्राथमिक शाळेच्या वर्गात भरले पाणी, साहित्याचे नुकसान

पणजी: ताळगावमधील शासकीय प्राथमिक शाळेची अवस्था जोरदार पावसामुळे अतिशय वाईट बनली आहे. शाळेचे छत दुरुस्तीच्या उद्देशाने काढण्यात आलेले असताना अचानक आलेल्या पावसामुळे संपूर्ण शाळेत पाणी शिरले असून अंतर्गत साहित्याचे मोठ्या प्रमाणावर नुकसान झाले आहे.

या गंभीर बाबीकडे आम आदमी पक्षाच्या स्थानिक नेत्या सिसिल रॉड्रिग्ज यांनी लक्ष वेधत स्थानिक आमदार जेनिफर मोन्सेरात आणि मुख्यमंत्री डॉ. प्रमोद सावंत यांच्याकडे तात्काळ कारवाईची मागणी केली आहे.

२० मे पासून गोव्यात पावसाचा ‘येलो अलर्ट’ दिलेला असतानाही सार्वजनिक बांधकाम विभागाने दुरुस्तीच्या कामात विलंब का केला? असा सवाल सिसिल रॉड्रिग्ज यांनी उपस्थित केला आहे. शाळेचे नवे शैक्षणिक वर्ष ४ जूनपासून सुरू होणार असताना सरकार या शाळेच्या स्थितीकडे पूर्णतः दुर्लक्ष करत आहे, असा आरोप त्यांनी केला.

४ जूनपासून विद्यार्थ्यांना कोठे बसवणार?

४ जूनपासून शाळा सुरू होणार आहे, पण या विद्यार्थ्यांना कोठे बसवणार? त्यांच्या शिक्षणासाठी पर्यायी व्यवस्था करण्यात आली आहे का? असा सवाल देखील सीसिल रॉड्रिग्ज यांनी उपस्थित केला. ताळगाव रोटरी क्लबने या शाळेसाठी अत्याधुनिक सुविधा स्वतःच्या खर्चातून पुरविल्या होत्या, पण आता त्या सर्व सुविधा पावसामुळे जलमय झाल्या आहेत, असेही त्या म्हणाल्या.