Milk Production: राज्यात दुग्ध उत्पादन वाढीसाठी कामधेनू योजनेंतर्गत सरकार प्रयत्नशील; मंत्री हळर्णकरांची माहिती

Milk Production in Goa: राज्य सरकारच्या पशुसंवर्धन आणि पशुवैद्यकीय सेवा खात्याच्या वतीने कामधेनू योजनेंतर्गत दुग्ध वाढीचा प्रयत्न नियमित होत असतो. यावेळी खात्याचे अधिकारी आणि पशुवैद्यकीय अधिकाऱ्यांना स्थानिक पातळीवर जाऊन योजनेची माहिती देऊन दुग्ध उत्पादन वाढीसाठी कामधेनू योजनेची माहिती देण्याचा उपक्रम राबविला जात असल्याची माहिती खात्याचे मंत्री निळकंठ हळर्णकर यांनी दिली.

हळर्णकर म्हणाले की, या योजनेतून शेतकऱ्यांना व युवकांना या व्यवसायाकडे वळवावे, यासाठी आकृष्ट करण्याचा प्रयत्न आहे. राज्य सरकार कामधेनू योजनेमार्फत विविध प्रकारच्या गाई-म्हैस खरेदीसाठी अनुदान देते. राज्यातील दुग्ध विक्रेत्यांकडून गोवा दूध संघाच्या दुधाची मागणी वाढत आहे, त्यामुळेच उत्पादन वाढणे आवश्‍यक आहे.

त्यासाठीच डिसेंबरपर्यंत ग्रामीण भागात अधिकारी व डॉक्टर जाऊन योजनांची माहिती देणार आहेत.राज्यातील गोवा दूध संघाला दररोज आपला कोटा पूर्ण करण्यासाठी परराज्यातून दहा ते पंधरा हजार लिटर दूध मागवावे लागते.

मागील कित्येक वर्षांपासून राज्य सरकार दुग्ध वाढीसाठी प्रयत्न करीत आहे. त्यासाठीच कामधेनू योजना राबविली आहे, या योजनेला हवी तशी गती मिळावी आणि त्याकडे राज्यातील युवकांनीही वळावे, पशुपालन करून त्यातून दुग्ध उत्पादन व्हावे अशी अपेक्षा खात्याची आहे. त्यासाठीच खात्याच्या वतीने जनसंपर्क मोहीम राबविली जात असल्याचे हळर्णकर यांनी सांगितले.