गुड फ्रायडेनिमित्त येथील मोती डोंगरावर असलेल्या कपेलसमोर 25 फूट उंच क्रॉसवर येशू ख्रिस्ताची प्रतिमा चढवून त्यांचे स्मरण करण्यात आले. यावेळी हिंदू भाविकही सहभागी होत असल्याने या संस्मरण कार्यक्रमाला धार्मिक सलोख्याचे प्रतीक म्हणूनही पाहिले जाते.
सकाळी येशूची प्रतिमा साकारल्यानंतर दुपारी भाविकांच्या उपस्थितीत ती खाली उतरविण्यात आली. त्यानंतर सामूहिक प्रार्थना झाल्यावर सायंकाळी येशूची मोती डोंगरावरून यात्रा काढण्यात आली.
डोंगराच्या पायथ्याशी असलेल्या होली स्पिरीट चर्चमध्ये यात्रेची सांगता झाली. यात शेकडो भाविकांनी सहभाग घेतला होता. सासष्टी तालुक्यातील कोलवा, बाणावली, माजोर्डा, बेतालभाटी, कुंकळ्ळी, वेळ्ळी, तसेच अन्य गावांत गुड फ्रायडेनिमित्त प्रार्थना करण्यात आली.
धार्मिक सलोख्याचे प्रतीक
मोती डोंगरावर एवढ्या उंचीवर येशूची प्रतिमा साकारणारे सासष्टी तालुक्यातील हे एकमेव ठिकाण आहे. या स्मरण विधीनंतर सायंकाळी येशूची यात्रा काढली जाते. तेव्हा येशूची प्रतिमा ठेवलेल्या पेटीला एक खांदा हिंदू धर्माचे लोक देतात. पूर्वी या ठिकाणी जे मंदिर होते, त्या मंदिराच्या महाजनांना हा मान दिला जातो.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
