मृत्युच्या जबड्यातून सुटून गोमंतकीय विद्यार्थी जेडेन मायभूमीत

सुशांत कुंकळयेकर

मडगाव: कानावर सतत येऊन आपटणारा बॉम्बचा आवाज, शेवटच्या दोन आठवड्यात अन्नाचा साठा संपल्याने एकाच जेवणावर काढला जाणारा दिवस आणि त्यातच लांबत गेलेली सुटका... अशा परिस्थितीत कधी बंकरमध्ये तर कधी हॉस्टेलच्या बंद खोलीत असा संपूर्ण एक महिना भीतीच्या तणावाखाली काढलेला बाणावली येथील जेडन परेरा हा 19 वर्षीय गोमंतकीय विद्यार्थी आज शनिवारी गोव्यात पोहोचला.

‘युक्रेनमधला प्रत्येक दिवस आम्हाला आमचा शेवटचा दिवस तर नाही ना असेच वाटायचे. आम्ही सुमारे 500 भारतीय विद्यार्थी तिथे अडकलो होतो.

आम्ही आमच्या घरी पोहोचणारच नाहीत ना अशी शंका आम्हाला क्षणोक्षणी यायची', ‘गोमन्तक’शी बोलताना जेडनने आपले ते भीषण अनुभव सांगितले. दरम्यान, राज्य प्रशासनातर्फे त्याचे स्वागत करण्यासाठी सासष्टीच्या संयुक्त मामलेदार सीमा गुडे या स्वतः उपस्थित होत्या. आई अनिता यांना आपला मुलगा सुखरूप परत आल्याचे पाहून जीवात जीव आला. यासाठी त्यांनी केंद्र व राज्य सरकार आभार मानले.

सैनिकांचा मज्जाव: जेडनसह इतर विद्यार्थी सुमी शहरात अडकले होते. हे शहर रशियाच्या अगदी जवळ असल्याने युक्रेनचे सैनिक त्यांना सुरक्षेच्या कारणास्तव सीमा ओलांडून रशियात जाऊ देत नव्हते. यामुळे त्यांचे भारतात परतणे कठीण झाले होते.

क्षेपणास्त्र हल्ले पाहिले

वास्तविक आम्हाला ज्या शहरात हलविले ते शहर बसमधून तीन तासांत गाठता येते. पण त्यावेळी रस्त्यांवर बॉम्ब वर्षाव चालूच होता. त्यामुळे आडवाटेने आम्हाला हे शहर गाठावे लागले. हा प्रवास तब्बल 13 तास लांबला. रस्त्यावरून जाताना मध्येच क्षेपणास्त्र फुटल्याचेही आम्ही पाहिले. हा सारा अनुभव भीतीदायक होता असे तो म्हणाला.