Partgali Math Rama Statue: तन में राम, रोम रोम में राम रे! पर्तगाळ मठाकडे भाविकांचा ओघ, अनुयायांचे जत्थे काणकोणात

काणकोण : गोकर्ण-पर्तगाळ मठात भाविकांचा ओघ वाढतच असून तिसऱ्यादिवशीही मठ परिसरात अनुयायांची मोठी गर्दी दिसून आली. गोव्यातील मठानुयायांबरोबरच अन्य राज्यांतील भाविकांनी मठ परिसरात गर्दी करून आध्यात्मिक अनुभव घेतला.

येथील श्रीरामाच्या ७७ फूट उंचीच्या प्रतिमेशेजारी उभे राहून सेल्फी तसेच श्रीरामाचे फोटो काढण्यासाठी प्रत्येक भाविक क्षणभर या परिसरात थबकत होता. कर्नाटकातील बंगळुरू, मंगळूर, म्हैसूर या प्रमुख शहरांबरोबरच कुमठा, उडुपी, बेळगाव, होन्नावर, अंकोला व अन्य ग्रामीण भागांतून भाविक खासगी वाहनांनी मोठ्या संख्येने येत होते.

चिंतना रामायण नृत्य....

शुक्रवारी माधव नारायण सभामंडपात बालश्री पुरस्कारप्राप्त विद्वान सुजय शानभाग आणि साथींनी चिंतना रामायण नृत्य सादर केले. त्यांनी कर्नाटक राज्योत्सवात त्यांनी भाग घेतला होता. त्याला रसिकांनी भरभरून दाद दिली. या नृत्यातील प्रमुख कलाकार सुजय शानभाग यांना मठाधीश श्रीमद् विद्याधीश तीर्थ स्वामींच्या हस्ते गौरविण्यात आले.

श्रीराम पट्टाभिषेक साजरा

गोकर्ण पर्तगाळ जीवोत्तम मठात आज श्रीराम पट्टाभिषेक हजारो भाविकांच्या उपस्थित साजरा झाला. त्याचप्रमाणे सीताराम कल्याणोत्सवही साजरा झाला. श्रीमद् विद्याधीश स्वामींनी या पट्टाभिषेकाचा धार्मिक विधी केला.त्यानंतर मठ जीर्णोद्धार कार्यात योगदान दिलेल्या कारसेवकांची श्रीमद् विद्याधीश तीर्थ स्वामींच्या हस्ते गौरव करण्यात आला. उद्या (ता.३०) ४.३० ते ७ पर्यंत श्रीराम प्रतिमा प्रतिष्ठा होणार आहे. त्यानंतर सेवा दिलेल्या दात्यांचा स्वामींच्या हस्ते गौरव होणार आहे.

तलवाडा-वेरोडा-कुंकळ्‍ळी येथील श्री शांतादुर्गा वेर्डेकरीण देवीचा वार्षिक कालोत्सव शुक्रवार, २८ नोव्‍हेंबरपासून सुरू झाला असून रविवार, ३० नोव्हेंबर रोजी कालोत्‍सवानिमित्त पहाटे श्रींची ब्रह्मरथातून भव्य मिरवणूक झाल्‍यानंतर आरती व प्रसादाने उत्सवाची सांगता हाेणार आहे.

शुक्रवार, २८ व शनिवार, २९ रोजी दिवसभर धार्मिक विधी करण्‍यात आले. शुक्रवारी देवीची अष्टदिपालक उत्सव रथातून भव्य मिरवणूक काढली तर शनिवार, २९ रोजी विनोदी नाटक ‘लटर फटर घंच्येकटर’, रात्री ११.३० वा. श्रींची विजय रथातून भव्य मिरवणूक काढली. रविवार, ३० रोजी सकाळी अभिषेक, आरती, रात्री १० वा. देणगी कुपनाचा निकाल, नंतर रात्री १०.३० वा. ‘ऑर्केस्ट्रा ओम मेलोडीज’, रात्री जागर, पहाटे श्रींची ब्रह्मरथातून भव्य मिरवणूक, आरती, प्रसाद हाेईल.