मडगाव: गोव्यातील दोन्ही जिल्हा पंचायत समित्यांवर भाजपचीच सत्ता पुन्हा येणार, असा दावा भाजपचे प्रदेश अध्यक्ष दामू नाईक यांनी केला असला तरी फारसा जनाधार नसलेल्या सासष्टीत भाजपने फक्त तीन जागाच लढविण्याचा निर्णय घेतला असून अन्य सहा जागांवर अपक्ष उमेदवारांना पाठिंबा देण्याची रणनीती निश्चित केली आहे.
सासष्टी तालुक्यात एकूण ९ जिल्हा पंचायत मतदारसंघांचा समावेश असून त्यापैकी दवर्ली व गिरदोली या दोन मतदारसंघांतून मागच्या जिल्हा पंचायत निवडणुकीत भाजपचे उमेदवार जिंकून आले होते. या दोन मतदारसंघांबरोबर यावेळी नावेली या तिसऱ्या मतदारसंघातून भाजप आपले नशीब अजमावून पाहत आहे.
‘एसटी’साठी राखीव असलेल्या गिरदोली मतदारसंघात भाजपने गोकुळदास गावकर यांना उमेदवारी दिली असून ‘ओबीसी’ राखीव असलेल्या दवर्ली मतदारसंघातून सत्यविजय नाईक तर महिलांसाठी राखीव असलेल्या नावेली मतदारसंघात लक्ष्मी शेटकर यांना उमेदवारी जाहीर केली आहे. यापैकी नावेली मतदारसंघात आपला उमेदवार निवडून आणण्यासाठी भाजपला बरेच कष्ट सहन करावे लागणार आहेत.
यासंदर्भात प्रतिक्रिया व्यक्त करताना नावेलीचे आमदार उल्हास तुयेकर म्हणाले की, दवर्ली हा आता आमचा बालेकिल्ला झाला आहे, त्यामुळे या मतदारसंघात भाजपचा उमेदवार सहजपणे जिंकून येईल; पण नावेली मतदारसंघ जिंकण्यासाठी आम्हाला थोडे कष्ट घ्यावे लागतील. असे जरी असले तरी दवर्ली मतदारसंघात भाजपचे विद्यमान सदस्य परेश नाईक यांना उमेदवारी नाकारल्याने त्यांचे कार्यकर्ते दुखावलेले आहेत आणि त्याचा फटका भाजपला बसू शकतो.
दुसऱ्या बाजूने गिरदोली मतदारसंघात भाजपचेच एकेकाळी केपे मंडळाचे अध्यक्ष असलेले संजय वेळीप यांनी बंडखोरी करून काँग्रेस उमेदवारी स्वीकारल्याने आणि या मतदारसंघात त्यांना लोकांचा पाठिंबा असल्याने भाजपचे गोकुळदास गावकर यांना ते जड होऊ शकतात. दक्षिण गोव्यात आमच्याकडे चांगले उमेदवार आहेत. दक्षिण गोव्यात सत्ता स्थापन करण्यासाठी जे १३ उमेदवार निवडून आणायची गरज आहे. आमचे त्यापेक्षाही अधिक उमेदवार सहज निवडून येतील, अशी अपेक्षा भाजपचे प्रदेशाध्यक्ष दामू यांनी व्यक्त केली.
सासष्टी तालुक्यात येणाऱ्या अन्य सहा मतदारसंघांत भाजप अपक्ष उमेदवारांना आपला पाठिंबा देणार आहे. संपूर्ण दक्षिण गोव्याचा विचार केल्यास या जिल्ह्यात समाविष्ट असलेल्या २५ मतदारसंघांपैकी १८ मतदारसंघांतून भाजप आपले उमेदवार उभे करत असून अन्य दोन जागा मित्रपक्ष असलेल्या मगो पक्षाला सोडण्यात आल्या आहेत. बाकी पाच जागांवर अपक्ष उमेदवारांना पाठिंबा देण्याचा निर्णय भाजपने घेतला आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.