Konkani Bhasha Mandal: युवा उद्योजक चिराग नायक यांच्याकडून कोकणी भाषा मंडळाला 1 कोटी, ट्रस्टतर्फे विद्यार्थ्यांना शिष्यवृत्ती

सासष्टी : मडगावमधील युवा उद्योजक तथा समाजसेवक चिराग नायक यांनी आपले वडील उद्योजक व साहित्यिक दत्ता दामोदर नायक यांच्या ७० व्या वाढदिवसानिमित्त कोकणी भाषा मंडळाला एक कोटी रुपयांची देणगी जाहीर केली आहे. येथे घेतलेल्या पत्रकार परिषदेत त्यांनी ही माहिती दिली.

तसेच आपला उद्योगसमूह पाच कोटी रुपयांचा फावंटेनहेड चॅरिटेबल ट्रस्ट स्थापणार असून पाच कोटी रुपयाच्या व्याजातून गरजू विद्यार्थ्यांना शिष्यवृत्त्या देण्यात येतील, असे त्यांनी सांगितले. या ट्रस्टच्या अध्यक्षपदी प्रा. भास्कर नायक यांची नियुक्ती केल्याचे तसेच डॉ. सुशीला मेंडीस, विजय हेदे व प्रशांत नाईक यांचा समावेश असेल असे जाहीर केले. या पत्रकार परिषदेला दत्ता दामोदर नायक व प्रा. भास्कर नायक उपस्थित होते.

असा वापरावा लागणार निधी

चिराग नायक यांनी पुढे सांगितले की, कोकणी भाषा मंडळाला ही देणगी देताना ही रक्कम कशी वापरावी या बद्दलच्या सूचना केल्या आहेत. या एक कोटी रुपयांतील ५० लाख रुपये बॅंकेमध्ये कायम स्वरुपी मुदत ठेव म्हणून ठेवावे व यातून मिळणाऱ्या व्याजातून चित्रंगी महिला मेळावा, सामाजिक परिषदा, कार्यशाळा आयोजित करावी.

उर्वरित ५० लाख रुपये असतील त्यातून प्रसिद्ध कोकणी साहित्यिकांच्या कथानकावर आधारित टेलिफिल्म तयार करावी. तसेच कोकणी भाषा मंडळाने कोकणीसाठी बालबोधीनी, प्रवेश, प्रबोध, प्रवीण, पंडित अशा पाच स्तरावरील परिक्षा घ्याव्यात, असेही चिराग नायक यांनी सुचविले आहे.