Women Reservation Bill: ...तर महिला आरक्षणासाठी 2031ची वाट पहावी लागेल: आलेमाव

Women Reservation Bill विधानसभेचे विरोधी पक्षनेते युरी आलेमाव यांनी लोकसभेत मंजूर झालेले महिला आरक्षण विधेयक योग्य दिशेने टाकलेले एक पाऊल असल्याचे म्हटले आहे. पण, प्रत्यक्षात गोव्यातील महिलांना आरक्षणाचा फायदा मिळण्यासाठी 2031 ची वाट पाहावी लागेल, अशीही टीका त्यांनी केली आहे.

कारण जनगणनेला आधीच उशीर झाला आहे. जनगणनेनंतरच मतदारसंघांचे नवीन सीमांकन होऊ शकते. त्यामुळे आरक्षण लागू होण्यास विलंब होईल, असे त्यांनी म्हटले आहे. जनगणनेच्या पहिल्या अहवालानंतर नवीन सीमांकन सुरू होईल.

याचा अर्थ महिला आरक्षण विधेयक २०३१ च्या गोवा विधानसभा निवडणुकीत प्रभावी होऊ शकते. जर ही प्रक्रिया लवकर पूर्ण झाली तर २०२९ च्या लोकसभा निवडणुकीत आरक्षण मिळू शकते किंवा २०३१ च्या विधानसभा निवडणुकांची वाट पाहावी लागेल,'' असे युरी म्हणाले.

लाखो महिलांचा विश्‍वासघात

काँग्रेसने नेहमीच महिला सक्षमीकरणाला प्राधान्य दिले आहे. म्हणूनच हे विधेयक लवकरात लवकर लागू होईल, अशी पक्षाला आशा आहे. कृतीच्या मागील हेतू ती कृती चांगली किंवा वाईट हे ठरवत असते. भाजप सरकारने आणलेले महिला आरक्षण विधेयक लाखो भारतीय महिला, मुली आणि इतर मागासवर्गीयांच्या आशांचा विश्वासघात आहे, असा आरोप आलेमाव यांनी केला.