Goa: विहिरीच्या कठड्यावर उभी राहून फुले काढण्याच्या प्रयत्नात महिला विहिरीत कोसळली.

वास्को: एका विहिरीत शुभांगी गडेकर (59 ) ही महिला फुले (Flowers) काढताना विहिरीचा (well) कठडा कोसळल्याने आत पडली. सदर प्रकार स्थानिकांच्या लक्षात येताच तिला पोलीस व अग्निशमन दलाच्या सहकार्याने वर काढून जीवदान दिले.

वास्को पोलिसांकडून मिळालेल्या माहितीनुसार, सकाळी वास्को मध्यवर्ती ठिकाणी असलेल्या गोवा सहकार भांडार समोर एका मोकळ्या जागेत शुभांगी गडेकर ही महिला फुले करण्यासाठी गेली असता तिथे असलेल्या एका विहिरीच्या कठड्यावर उभी राहून फुले काढण्याचा प्रयत्न केला असता, विहिरीचा कठडा तोडून ती महिला विहिरीत कोसळली.

मोठा आवाज आल्याने येथील शेजारच्या इमारतीतून एका महिलेने हा प्रकार पाहिला व तीने इतरांना याची माहिती दिली व घटनास्थळी धाव घेतली. यावेळी विहिरीत पडलेल्या महिलेनेही बचावासाठी आरडाओरडा केली. यावेळी तिथे जमलेल्या लोकांनी पोलिसांना तसेच वास्को अग्निशमन दलाला याची माहिती दिली. त्यांनी घटनास्थळी येऊन या महिलेला विहिरीतून बाहेर काढले. दैव बलवत्तर म्हणून सदर महिला सहीसलामत बचावली.

पूर्वी या जागेवर पुष्पांजलि इमारत होती. ती जीर्ण झाल्याने पाडण्यात आली होती. आता या ठिकाणी दाट झाडी निर्माण झाली आहे. या झाडीत सदर विहीर आहे सदर महिला नवेवाडे येथील रहिवासी असून ती पालिकेची सफाई कामगार आहे. शहरात साफसफाईचे काम करत आहे.