Goa Crime: पर्यटकांना हेरून मौल्यवान वस्तू चोरायचा, कॅसिनोत जाऊन उधळायचा! हॉटेल चोरी प्रकरणातील कासीमचे कारनामे उघड

मडगाव: बालपणापासून  लहानसहान चोऱ्या करणारा कासिम फय्याजला  झटपट श्रीमंत व्हायचे होते, त्यातून त्याने तारांकित हॉटेलमध्ये उतरलेल्या पर्यटकांना सावज बनविण्यास सुरुवात केली होती.  त्यांचे मौल्यवान वस्तू  चोरून,  नंतर त्यातून मिळालेली रोकड, तो कॅसिनोवर  उधळीत होता. त्याला जुगाराचे व्यसन होतेच. झटपट श्रीमंत होण्यासाठी त्याने हा मार्ग अवलंबिला होता.

कासिमने एक सोनसाखळी, १ नेकलेस, ४ कर्णफुले, २ अंगठ्या चोरली होती. हेच दागिने त्याने आपला मित्र प्रदीपला देऊन, त्याच्याशी तो खोटे बोलला होता. पोलिसानी शोध घेऊन दागिने जप्त केले होते. पर्यटक राहत असलेल्या रुमाच्या खिडकीचे दार उघडून चोरी करण्यात त्याचा हातखंडा आहे. वार्का येथे त्याने केलेली चोरी सीसीटीव्हीमध्ये बंदिस्त झाली होती, पोलिसानी तपास करून शेवटी कासीमला गजाआड केले. सध्या तो कोलवा पोलिसांच्या पोलिस कोठडीत आहे.

पोलिस  तपासात या बाबी उघड झाल्या आहेत.  चोरी करण्याची त्याला सवय जडली होती. वार्क येथील क्लब महिंद्रा येथे त्याने तब्बल तीन चोरी केल्या आहेत. या हॉटेलात रूममध्ये रहात असलेल्या एका आयएस आय अधिकाऱ्याचे दहा लाखांचे सुवर्णलंकार त्याने पळविले होते.

उडपीचा रहिवाशी!

कासिम  मूळ  उडपी येथील आहे. त्याने आपला मित्र प्रदीपला  आपण आर्थिक विवंचनेत असल्याचे सांगून हे दागिने आपली पत्नी व मुलीचे असल्याचे खोटे सांगून त्याच्याकडून पैसे घेतले होते. प्रदीपने  हे दागिने एका वित्त कंपनीत तारण ठेऊन तेथून कर्ज घेऊन नंतर ती रक्कम त्याला दिली होती.