Vasco News: एजन्सी कर्मचारी आणि ग्राहकांमध्ये शाब्दिक वाद झाला ; सांकवाळमध्ये कमी वजनाचे सिलिंडर

Vasco News: सांकवाळ येथे घरांमध्ये वितरित केलेले अनेक एलपीजी गॅस सिलिंडर निर्धारित वजनापेक्षा कमी वजनाचे असल्याचे आढळून आल्याने सांकवाळ गावात एकच खळबळ माजली. एलपीजी एजन्सी कर्मचारी आणि ग्राहकांमध्ये शाब्दिक वाद झाला. स्थानिकांनी वजन आणि मापे विभागाच्या अधिकाऱ्यांना बोलावून कायदेशीर तक्रार केली. मात्र, टेम्पोचा चालक व 2 कर्मचारी वाहन सोडून पळून गेले.

गॅस सिलिंडरची गाडी सांकवाळ येथे दाखल झाल्यानंतर ग्राहकांनी गॅस सिलिंडर घेतले. मात्र, थोड्या वेळातच काही नागरिकांना सिलिंडरच्या वजनात तफावत असल्याचे जाणवले. त्यांनी याबद्दल गॅस एजन्सीच्या कर्मचाऱ्यांकडे विचारणा केली.

पण गॅस एजन्सीच्या कर्मचाऱ्यांनी उडवाउडवीची उत्तरे दिली. यामुळे नागरिक आणि एजन्सी कर्मचारी यांच्यात वाद झाला. या वादानंतर थोड्या वेळातच चालक आणि कर्मचारी वाहन सोडून पळून गेले. त्यांच्या पळून जाण्याने ग्राहकांना आपली फसवणूक झाल्याचे स्पष्ट झाले.

केंद्र सरकारचा क्रांतिकारी निर्णय

घरगुती गॅस सिलिंडरबाबत केंद्र सरकारने एक क्रांतिकारी निर्णय घेतला आहे. त्यामुळे आता गॅस सिलिंडरच्या काळ्या बाजाराला आळा घालणे सोपे होणार आहे. त्यासाठी लवकरच घरगुती गॅस सिलिंडरवर ‘क्यूआर कोड’ लावण्यात येणार आहे.

याबाबतची माहिती केंद्रीय पेट्रोलियममंत्री हरदीप सिंग पुरी यांनी नुकतीच दिली आहे. याची अंमलबजावणी कधी होणार याकडे सर्वांचे लक्ष लागले आहे.