Goa Vaccination : संपूर्ण जगावर थैमान घातलेल्या कोरोना विषाणूपासून (COVID-19) बचावासाठी देशभरात लसीकरणाचा वेग वाढवण्यात आला असून दोन्ही डोस घेणे सरकारने बंधनकारक केले आहे. पणजीमध्ये डिसेंबरपासून नागरिकांना कोविड लसीकरण (Vaccination) आठवड्यातून सहा दिवस, फक्त आरोग्य केंद्रांवर (Health Center) करता येऊ शकते. सरकारने शाळा, पंचायत हॉल, सांस्कृतिक केंद्रे इत्यादी ठिकाणी असलेली लसीकरण केंद्रे तात्पुरती बंद केली आहेत. शिवाय यापुढे रविवारी लसीकरण होणार नाही.
“लोक आमच्या 40 आरोग्य केंद्रांपैकी कोणत्याही प्राथमिक, समुदाय, शहरी आरोग्य केंद्रे आणि रुग्णालयांसह लसीकरण करू शकतात. या महिन्यापासून रविवारी लसीकरण केले जाणार नाही,” असे राज्य लसीकरण अधिकारी डॉ. राजेंद्र बोरकर यांनी सांगितले. शाळा परत सुरु झाल्याच्या पार्श्वभूमीवर लसीकरण केंद्रे असलेल्या शाळांनी त्यांचा परिसर परत देण्याची विनंती केली आहे आणि जिल्हाधिकाऱ्यांना त्यांच्या कर्मचाऱ्यांची आवश्यकता आहे. त्यामुळेच आता फक्त आरोग्य केंद्रावर लसीकरण करण्यात येणार आहे.
“हर घर दस्तक मोहिमेअंतर्गत घरोघरी लसीकरण डिसेंबरपर्यंत सुरू राहणार आहे. जे लोक घराबाहेर पडू शकत नाहीत ते त्यांच्या आरोग्य केंद्रांशी संपर्क साधू शकतात. लाभार्थ्याला आरोग्य केंद्रात आणण्यासाठी व्यवस्था करावी की ती व्यक्ती घरी लसीकरणासाठी पात्र आहे की नाही याचा निर्णय आरोग्य अधिकारी घेतील. शेवटी कोणाचीही अवहेलना केली जाणार नाही, त्यांना लस दिली जाईल,” असे डॉ. बोरकर म्हणाले.
शिवाय बालकांच्या लसीकरणाच्या पद्धतींबाबत राज्याला कोणतीही मार्गदर्शक तत्त्वे अद्याप प्राप्त झालेली नाहीत. तसेच बूस्टर डोसबाबत कोणतीही माहिती मिळालेली नाही. गोव्यात दोन्ही डोस पूर्ण झालेल्यांची संख्या 90% च्या जवळपास आहे. गुरुवारी 2974 व्यक्तींनी त्यांचा दुसरा डोस घेतला तर 806 जणांना त्यांचा पहिला डोस देण्यात आला. यामध्ये इतर राज्यांतून गोव्यात कामाला येणारे लोक तसेच १८ वर्षांचे तरुण असू शकतात. ही चांगली गोष्ट आहे की लसीकरण न केलेले लोक संरक्षण मिळवण्यासाठी येत आहेत.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
