Yuri Alemao: स्थानिकांची घरे वाचवा! कुंकळ्ळी बायपाससाठी निधी मंजूर झाल्यानंतर युरी आलेमाव यांची गडकरींना विनंती

Yuri Alemao: केंद्रीय मंत्री नितीन गडकरी यांनी कुंकळ्ळी बायपाससाठी ₹310.92 कोटी मंजूर करण्याची घोषणा केली असून या घोषणेचे विरोधी पक्षाकडून स्वागत करण्यात आले आहे.

याच संदर्भात विरोधी पक्ष नेते आणि कुंकळ्ळीचे आमदार युरी आलेमाव यांनी या संदर्भात सोशल मिडीयावर गडकरींच्या घोषणेचे स्वागत करत गडकरींना एक विनंती केली आहे.

आलेमाव यांनी प्रसिद्ध केलेल्या पत्रात असे म्हटले आहे की, मी रस्ते वाहतूक मंत्रालयाला आवाहन करतो की नियोजित बायपासच्या कामामुळे येथील स्थानिकांच्या घराचे कोणतेही नुकसान होणार नाही तसेच येथील पर्यावरणाची कोणतीही मोठी हानी होणार नाही याची दखल घेणे महत्वाचे आहे, असे विरोधी पक्षनेते युरी आलेमाव यांनी म्हटले आहे.

कुंकळ्ळी येथील वाहतूक कोंडी ही प्रमुख समस्या आहे. मुख्य बाजारपेठेतून अवजड वाहनांची ये-जा सुरू असल्याने बाजारपेठेत येणाऱ्यांना मोठा धोका निर्माण होत आहे.

सध्याच्या महामार्गापासून काही मीटर अंतरावर शाळा असून वाहनांच्या रहदारीमुळे शालेय मुलांनाही अपघाताचा धोका संभवेल अशी शक्यता युरी आलेमाव यांनी वर्तवली आहे.

मला आशा आहे की सार्वजनिक बांधकाम विभाग तसेच रस्ते वाहतूक मंत्रालय स्थानिक रहिवाशांना विश्वासात घेऊनच बायपासचे स्ट्रक्चर तयार करतील.

तसेच या बायपासमुळे स्थानिकांच्या घरांचे कोणत्याही प्रकारचे नुकसान होणार नाही याची मी काळजी मी घेईन, असे युरी आलेमाव यांनी सांगितले.

सरकारने स्थानिकांना विश्वासात घेऊनच दांडेवाडो ते उसकिणी आर्क या महामार्गाच्या विस्तारीकरणाचे काम हातात घ्यावे. सदर महामार्गाच्या बाजूला असलेल्या घरांना कोणताही धोका होता कामा नये याची दखल सरकारने घेणे गरजेचे आहे, असे युरी आलेमाव यांनी म्हटले आहे.

बायपास तसेच महामार्ग विस्तारीकरणासाठी भूसंपादनाच्या प्रक्रियेवर मी बारकाईने लक्ष ठेवीन आणि स्थानिकांची कोणतीही गैरसोय होणार नाही याची काळजी घेईन, असे आश्वासन युरी आलेमाव यांनी दिले आहे.