मडगाव: सरत्या वर्षाला निरोप देण्यासाठी तसेच नव्या वर्षाचे स्वागत करण्यासाठी गोव्यात पर्यटकांची गर्दी वाढली असली तरी यंदा पुरेशा प्रमाणात विदेशी पर्यटक येथे न आल्याने एकूणच पर्यटन व्यावसायिकांवर विपरित परिणाम झाला आहे. पर्यटकांची गर्दी दिसते; पण तरीही व्यवसाय मंदावलेलाच, अशी हाॅटेल व्यावसायिकांची एकंदर परिस्थिती आहे.
हडफडे येथे झालेली नाईट क्लबमधील दुर्घटना आणि चार्टर विमानांत झालेली घट यामुळे यावेळी गोव्यात विदेशी पर्यटक फारसे आलेले नाहीत. गोव्यातील लहान आणि मध्यम हाॅटेल्स ही अशा विदेशी पर्यटकांवर चालतात;
पण यंदा त्यांचीच संख्या कमी झालेली आहे. पर्यटन व्यावसायिकांची शिखर संस्था असलेल्या ‘टीटीएजी’ या संघटनेचे अध्यक्ष जॅक सुखिजा यांची यासंदर्भात प्रतिक्रिया विचारली असता,
गोव्यातील पंचतारांकित हॉटेलांत ७० ते ७५ टक्के ऑक्युपन्सी आहे. ही जरी गोष्ट खरी असली तरी त्यापेक्षा कमी दर्जाच्या हॉटेल्समध्ये ऑक्युपन्सी त्यामानाने बरीच कमी आहे. हा पर्यटन हंगाम गोव्यातील हॉटेल व्यावसायिकांसाठी फारसा समाधानकारक नाही, असे सांगितले.
‘टीटीएजी’ संघटनेचे सदस्य असलेले दक्षिण गोव्यातील हॉटेल व्यावसायिक सेराफीन कोता यांनीही ही गाेष्ट मान्य केली. ते म्हणाले, हडफडे दुर्घटनेमुळे उत्तर गोव्यात पर्यटक कमी झाले आहेत.
दक्षिण गोव्यात जरी हे वर्ष संपता संपता पर्यटकांची संख्या वाढली असली तरी त्यातील बरेच पर्यटक खासगी घरे भाड्याने घेऊन राहणारे असल्याने सर्वसामान्य व्यावसायिकाला त्यांच्यापासून कुठलाही फायदा झालेला नाही.
सध्या गोव्यात येणारे देशी पर्यटक पैसे खर्च करण्यात कंजुषी दाखवितात त्याचाही फटका पर्यटन व्यावसायिकांना बसलेला आहे. यासंदर्भात मत व्यक्त करताना काणकोण येथील एका स्थानिक हॉटेल व्यावसायिकाने आपले नाव न छापण्याच्या अटीवर, ही परिस्थिती येण्यासाठी गोव्यातील हॉटेल व्यावसायिकच जबाबदार आहेत.
गोव्यात येणारा पर्यटक सर्वांत आधी टॅक्सीवाल्यांच्या दादागिरीमुळे हैराण झालेला असताे. अशातच काही हॉटेल व्यावसायिक आपल्याकडे येणाऱ्या पर्यटकांना अव्वाचे सव्वा दाम आखून वस्तू विकतात. त्यामुळे पर्यटकही अशा व्यावसायिकांकडे साशंकतेेने पाहत आहेत. त्यामुळेच हे पर्यटक हॉटेलात न रहाता खासगी घरात राहणे पसंत करतात, असे त्यांनी सांगितले.
१.न्यू इअरच्या काळात गोव्यात आलेल्या पर्यटकांना पुरेशी सुरक्षा मिळावी यासाठी दक्षिण गोव्यातील महत्त्वाच्या पर्यटनस्थळांवर पोलिसांचा पुरेसा बंदाेबस्त ठेवण्यात आलेला आहे. रस्त्यावर वाहतुकीची कोंडी हाेऊ नये यासाठी पुरेशा प्रमाणात वाहतूक पोलिस रस्त्यावर तैनात केले जाणार आहेत.
२.पर्यटकांच्या सुरक्षेसाठी क्लब्स, हॉटेल्समध्ये पुरेेशे अग्निसुरक्षा उपाय घेण्यात यावेत यासाठी हॉटेल व्यावसायिकांना सतर्क करण्यात आले आहे. हे उपाय घेतले जात आहेत की नाहीत, हे प्रशासकीय अधिकाऱ्यांकडून तपासले जात आहे, अशी माहिती दक्षिण गोव्याचे पोलिस अधीक्षक टिकम सिंग वर्मा यांनी दिली.
दक्षिण गोव्यातील शॅकचालक आणि अखिल गोवा शॅकमालक कल्याण संघटनेचे अध्यक्ष क्रूझ कार्दोज यांना विचारले असता, ख्रिसमसच्या काळात युरोप आणि रशियामधून जे पर्यटक गोव्यात येतात त्यावर गोव्यातील हाॅटेल व्यावसायिकांचा व्यवसाय अवलंबून असतो. मात्र, यावेळी रशियन आणि ब्रिटीश पर्यटक पुरेशा प्रमाणात गोव्यात आले नाहीत. त्याचा परिणाम सध्या पर्यटन व्यावसायिकांवर होत आहे. या दोन दिवसांत जर पर्यटकांची संख्या वाढली तर काही प्रमाणात व्यवसाय वाढू शकेल, असे मत त्यांनी व्यक्त केले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.