गोव्यातील पर्यटन खात्याच्या सुविधा आता ऑनलाईन

पणजी: राज्यातील पर्यटन वाढीसाठी आणि पर्यटन उद्योगातील व्यावसायिकांसाठी येत्या आठवड्याभरात सर्व सुविधा ऑनलाईन केल्या जातील, असे प्रतिपादन पर्यटनमंत्री रोहन खवंटे यांनी केले.

ट्रॅव्हल ॲण्ड टुरिझम असोसिएशन ऑफ गोवाच्या (टॅग) 34 व्या शपथविधी सोहळ्यात ते बोलत होते. दोनापावल येथील एका पंचतारांकित हॉटेलमध्ये आयोजित सोहळ्यास पर्यटन खात्याचे सचिव रवी धवन, टॅगचे नवनिर्वाचित अध्यक्ष नीलेश शाह, माजी अध्यक्ष सविओ मेसायस आणि कार्यकारी समितीचे पदाधिकारी उपस्थित होते.

पुढे बोलताना मंत्री खवंटे म्हणाले, राज्यातील पर्यटन वाढावे यासाठी सरकार अधिक प्रयत्न करत आहे. या उद्योगातील व्यावसायिकांना यापूर्वी अनेक समस्यांचा सामना करावा लागत होता. विविध प्रकारचे परवाने आणि ना - हरकत दाखले घ्यावे लागत होते. हे सर्व प्रत्यक्ष कार्यालयात जाऊन करावे लागत होते. यात त्यांचा वेळ आणि पैसा वाया जात होता, असे मंत्री खवंटे म्हणाले.

‘टॅग’च्या समस्या सोडवू

टॅग ही संस्था अनेक वर्षांपासून कार्यरत आहे. मी स्वतः पर्यटन उद्योगात होतो. यामुळे मला या व्यवसायातील अडचणी आणि समस्या माहीत आहेत. टॅगच्या पदाधिकाऱ्यांनी मला सांगितलेल्या सर्व समस्या सोडवल्या जातील. तसेच राज्यातील पर्यटन वाढीसाठी सुरू असलेल्या त्यांच्या प्रत्येक उपक्रमात सरकार त्यांच्यासोबत असेल, अशी ग्वाही मंत्री खवंटे यांनी यावेळी दिली.