Goa News: राजेश कळंगुटकर गोवा फॉरवर्डमध्ये, वाचा दिवसभरातील घडामोडी

'आप'चे माजी नेते राजेश कळंगुटकर गोवा फॉरवर्डमध्ये दाखल झाले आहेत. आमदार विजय सरदेसाई यांनी त्यांचं स्वागत केलंय.

काणकोण बसस्थानकाच्या प्रवेशद्वाराजवळील मुख्य रस्त्यावर मोठे खड्डे निर्माण झाल्याने वाहनचालकांना प्रचंड त्रास सहन करावा लागत आहे. या खड्ड्यांमुळे विशेषतः दुचाकीस्वारांना तोल सांभाळणे अवघड जात आहे. दिवसभर वाहतुकीचा मोठा ताण असलेल्या या भागात वाहनचालकांना सावधगिरीने वाहन चालवावी लागत आहे. नागरिकांनी तातडीने दुरुस्ती करण्याची मागणी केली आहे.

सहावा वेतन आयोग लागू करा, या मागणीसाठी राज्यातील १९० पंचायतीच्या ४५० कर्मचाऱ्यांनी साखळी येथे मुख्यमंत्री डॉ. प्रमोद सावंत यांची भेट घेतली. २०१६ पासून ही मागणी प्रलंबित असल्याचे कर्मचारी म्हणाले. दरम्यान, मुख्यमंत्र्यांनी कर्मचाऱ्यांना सहावा वेतन आयोग लागू करण्याचे आश्वासन दिले आहे.

म्हापशात कार पलटी होऊन अपघात घडल्याची घटना समोर आली आहे. बेशिस्त पार्किंगमुळे हा अपघात झाल्याचे प्रत्यक्षदर्शीनी सांगितले. अपघातामुळे या भागात वाहतूक कोंडी निर्माण झाली. यात चालकाला किरकोळ दुखापत झाली आहे.

मागण्या पूर्ण झाल्या नाहीत तर उपोषणावर जाण्याचा इशारा गोवा डेअरीच्या कर्मचाऱ्यांनी दिला आहे. याबाबतची नोटीस व्यवस्थापकीय संचालक आणि संचालक यांना कर्मचाऱ्यांकडून देण्यात आली आहे. यासाठी १० नोव्हेंबरची मुदत देण्यात आली आहे.

पेडणे तालुक्यात भात कापणी मशीनसंदर्भात कृषी खात्याच्या अधिकाऱ्यांकडून होत असलेल्या गैरव्यवस्थापनाने त्रस्त झाल्याने 'कृषी विभूषण' शेतकरी तथा पेडणे तालुका फार्मर प्रोड्युसर कंपनीचे अध्यक्ष उदय प्रभुदेसाई यांनी कृषी खात्याच्या करंझाळे येथील कार्यालयाबाहेर छेडले आंदोलन. मागणी मान्य झाल्याशिवाय माघार न घेण्याचा इशारा.

बागा आणि हडफडे येथे झळकलेल्या पाकिस्तान झिंदाबाद डिजिटल फलकप्रकरणी बजरंग दल आक्रमक झाले आहे. बजरंग दलाच्या गोवा विभागाने याप्रकरणी उत्तर गोवा पोलिस अधीक्षकांकडे तक्रार दाखल केली आहे. हे प्रकरण गंभीर आणि देशद्रोही असल्याचे मत नोंदवर कठोर कारवाई करण्याची मागणी दलाने केली.