Goa Todays Live Update News: पावसाळी अधिवेशनासाठी नागरिकांकडून सरदेसाईंनी मागवल्या सूचना

गोवा फॉरवर्ड पक्षाचे प्रमुख विजय सरदेसाई यांनी आगामी पावसाळी अधिवेशनासाठी नागरिकांडून सूचना मागवल्या आहेत. भाजप सरकार सर्वच आघाड्यांवर फेल ठरल्याचे सरदेसाई म्हणाले. अधिवेशनादरम्यान आम्ही विधानसभेत सरकारच्या चुकीच्या कामांचा आम्ही पर्दाफाश करु. नागरिक आपल्या सूचना publicsuggestions@goaforward.in. या ईमेलवर पाठवू शकतात. नागरिक 5 जुलै 2024 पर्यंत सूचना पाठवू शकतात, असे गोवा फॉरवर्डचे प्रमुख विजय सरदेसाई यांनी सांगितले.

श्रेया धारगळकरला म्हापसा सत्र न्यायालयाने जामीन मंजूर केला आहे. न्यायालयाने काही अटी आणि शर्तींसह 50,000 च्या जातमुचलक्यासह जामीन मंजूर केला.

सोमवारी म्हापसा येथील सिव्हिल कोर्ट रोडजवळ असलेल्या पावलो हाऊसजवळील इलेक्ट्रिकल ट्रान्सफॉर्मरला आग लागली. अग्निशमन आणि आपत्कालीन सेवा कर्मचाऱ्यांनी घटनास्थळी पोहोचून तात्काळ आग आटोक्यात आणली. विद्युत विभागाचे लाईनमन सध्या दुरुस्तीचे काम करत आहेत. सुदैवाने कोणतीही जीवीतहानी झाली नाही.

आसगाव-बार्देश येथे चारचाकी कार जळून खाक झाली. या घटनेत तब्बल पाच लाखांचे नुकसान झाल्याचा अंदाज आहे. चारचाकी कारला कोणी आग लावली हे अद्याप स्पष्ट नाही. यासंबंधीचा तपास सुरु आहे.

बेतोडा पंचायत क्षेत्रातील शिगनेव्हाळ गावात नारायण गावडे यांच्या घरी मोठी चोरी झाली. चोरट्यांनी त्यांच्या घरातील कपाट फोडून दागिने आणि तब्बल 60 हजारांची रोकड लंपास केली. या भागात बिगर गोमंतकीयांचा संचार वाढल्याने पोलिस गस्त वाढवण्याची मागणी बेतोड्याचे सरपंच मधु खांडेपारकर यांनी केली आहे.

पणजी शहरामध्ये स्मार्ट सिटीसंदर्भात सुरु असलेल्या निकृष्ट दर्जाच्या कामाबाबत पोलिसांत जबाबदार कंत्राटदाराविरोधात तक्रार (एफआयएर) दाखल करा. नव्याने बांधकाम केलेले क्राँक्रिटची कामे अनेक ठिकाणी कोसळत असल्याने स्मार्ट सिटी कामाचे ऑडिट आणि चौकशी करण्याची मागणी गोवा फॉरवर्डचे अध्यक्ष आणि आमदार विजय सरदेसाई यांनी मुख्य सचिवांना पाठवलेल्या पत्रात केली आहे.