Student Assault Case: 16 वर्षीय विद्यार्थ्याला मारहाण करणाऱ्या शिक्षिकेविरोधात पोलिस कारवाई; चौकशीसाठी हजर राहण्याची तंबी

म्हापसा: एका १६ वर्षीय विद्यार्थ्याला मारहाण केल्याप्रकरणी म्हापसा पोलिसांनी शिक्षिकेविरोधात गोवा बालकायद्यांतर्गत गुन्हा नोंद केला आहे. पीडित मुलगा इयत्ता दहावीत शिकतो. याप्रकरणी पोलिसांनी संशयित शिक्षिकेला बीएनएस ३५(३) कलमाअंतर्गत चौकशीसाठी तपास अधिकाऱ्यांसमोर हजर राहण्यासाठी नोटीस जारी केली आहे.

दरम्यान, शालेय व्यवस्थापनानेही या शिक्षिकेवर (Teacher) आवश्यक कारवाई करण्यासंदर्भातील पत्र शिक्षण संचालनालयाला पाठविल्‍याचे सूत्रांनी सांगितले. ही घटना २४ जानेवारी रोजी दुपारी घडली होती.

संशयित शिक्षिकेने रागाच्या भरात विद्यार्थ्याला (Student) स्टीलच्या पट्टीने मारहाण केली तसेच कानशिलातही लगावली. मुलाने पिण्याच्या पाण्यासाठी वारंवार आग्रह धरल्याने शिक्षिकेला राग अनावर झाला. त्यातूनच हे कृत्‍य घडले. ही घटना त्‍या मुलाने आपल्या घरी कथन केली. त्यानंतर पीडितेच्या आईने मंगळवारी पोलिसांत तक्रार दाखल केली होती.