National Award : पावसकर, हाजिक यांना राष्‍ट्रीय पुरस्‍कार प्रदान

National Award : पणजी, गोवा राज्य दिव्यांगजन आयोगाचे आयुक्त गुरुप्रसाद पावसकर आणि आयोगाचे सचिव ताहा हाजिक यांना यंदाच्‍या दिव्यांगजनांच्या सक्षमीकरणासाठी दिल्या जाणाऱ्या राष्ट्रीय पुरस्काराने राष्ट्रपती द्रौपदी मुर्मू आणि केंद्रीय मंत्री वीरेंद्र कुमार यांच्या हस्ते सन्मानित करण्यात आले. नवी दिल्ली येथे आज रविवारी हा पुरस्‍कार वितरण सोहळा पार पडला.

गोव्याच्या इतिहासात हा एक मैलाचा दगड ठरला आहे. पावसकर हे दिव्यांग अधिकार अधिनियम २०१६ अंतर्गत ‘आपल्या राज्यात यशस्वी अंमलबजावणी’ या विभागात सर्वोत्कृष्ट राज्य आयुक्त ठरले तर हाजिक यांना ‘सर्वश्रेष्ठ दिव्यांगजन’ विभागात पुरस्कार प्रदान करण्यात आला. या पुरस्कारांमुळे दिव्यांगजनांसाठी त्यांनी केलेले कार्य अधोरेखित झाले आहे.

पावसकर आणि हाजिक यांच्या नेतृत्वाखाली आंतरराष्ट्रीय पर्पल फेस्ट उपक्रम यशस्वी ठरला. या सर्वसमावेशक कार्यक्रमाद्वारे दिव्यांगांच्या विविध समूहांना आपल्या क्षमता आणि कलागुण प्रदर्शित करण्याची संधी प्राप्त झाली.