Indian Super League: एफसी गोवा आयएसएल ‘शिल्ड’साठी दावेदार

Indian Super League: एफसी गोवा संघाला इंडियन सुपर लीग (आयएसएल) फुटबॉल स्पर्धेत ‘शिल्ड’ जिंकण्याची संधी असल्याचा दावा मुख्य प्रशिक्षक मानोलो मार्केझ यांनी शनिवारी पत्रकार परिषदेत केला. बाकी पाचही सामने जिंकण्याचा आपल्या संघाचा निर्धार असल्याचा विश्वासही त्यांनी यावेळी व्यक्त केला.

‘‘होय, एफसी गोवा संघ शिल्ड विजेतेपद मिळवू शकतो. आम्ही सामने जिंकण्यावर सारे अवलंबून आहे. इतर संघांचे निकाल आम्ही नियंत्रित करू शकत नाही, पण आम्ही आमचे सामने जिंकण्यासाठी प्रयत्नशील राहू,’’ असे 55 वर्षीय स्पॅनिश मार्गदर्शक म्हणाले.

एफसी गोवा व पंजाब एफसी यांच्यातील सामना सोमवारी (ता. ११) नवी दिल्लीत खेळला जाईल. त्या पार्श्वभूमीवर मार्केझ बोलत होते.

एफसी गोवा संघाने दोन बरोबरी व तीन पराभवानंतर मागील लढतीत फातोर्ड्यात ईस्ट बंगालला एका गोलने हरवून ‘शिल्ड’साठी दावा कायम राखला. ईस्ट बंगालविरुद्ध काही संधी हुकल्या, आम्हाला आणखी गोल करणे शक्य होते, तरीही आपला संघ ईस्ट बंगालविरुद्धच्या लढतीत चांगला खेळल्याचे मार्केझ यांनी नमूद केले. एफसी गोवाने १७ लढतीत नऊ विजय नोंदविताना ३२ गुणांसह चौथा क्रमांक प्राप्त केला आहे.

पंजाब एफसी संघ तुल्यबळ

स्पर्धेच्या पहिल्या टप्प्यात फातोर्डा येथे एफसी गोवाने पंजाब एफसीला एका गोलने हरविले होते, तेव्हा विजयासाठी एफसी गोवास झुंजावे लागले होते. त्या अनुषंगाने मार्केझ यांनी सांगितले, की ‘‘पंजाब एफसीने मागील काही सामन्यांत चांगला खेळ केलेला आहे.

त्यांच्यापाशी दर्जेदार खेळाडू असून ते प्ले-ऑफ फेरीतील सहाव्या जागेसाठी ते प्रयत्नशील आहेत. पंजाबविरुद्धचा सामना आमच्यासाठी निश्चितच सोपा नसेल.’’ सध्या पंजाब एफसीचे १८ सामन्यांतून २० गुण आहेत. अगोदरच्या सामन्यात त्यांनी नॉर्थईस्ट युनायटेडला धक्का दिला होता.