Govind Gaude: गावडे-तवडकर वादावर पडदा; कला-संस्‍कृती मंत्री म्हणतात माझ्यासाठी 'विषय संपला'

Govind Gaude: मागील काही दिवस राज्यात गाजत असलेल्या तवडकर - गावडे वादासंबंधी नवनवीन अपडेट येत असून नुकतीच गावडे यांनी या प्रकरणासंबंधी आपली प्रतिक्रिया दिलीय.

''त्या विषयावर मला आता काहीच बोलायचे नाही. माझ्यासाठी तरी तो विषय संपलाय'' असे सांगून गावडेंनी या प्रकरणावर पडदा टाकायचा प्रयत्न केलाय.

या प्रकरणाची पार्श्वभूमी पाहता सुरुवातीला या दोघांमधील वाद मिटवण्याचा प्रयत्न भाजप प्रदेशाध्यक्ष तानावडे यांनी केला होता.

''हा त्यांच्यातला अंतर्गत वाद आहे. मुख्यमंत्र्यांची भेट घेऊन हा वाद सोडवला जाईल'', असे म्हणत हे प्रकरण शमवण्याचा प्रयत्न केला होता.

तसेच दुसऱ्याच दिवशी तानवडे, तवडकर आणि गावडे यांची मुख्यमंत्र्यांच्या निवासस्थानी एकत्रित बैठकही झाली होती.

त्यानंतर सभापती रमेश तवडकर आणि कला-संस्‍कृतीमंत्री गोविंद गावडे यांच्‍यातील वादाचे प्रकरण बासनात गुंडाळून ठेवण्‍यास सरकार यशस्‍वी ठरले होते.

हा वाद संपतो न संपतो तोच गावडे - तवडकर वादाला नवीन तोंड फुटत ऑडिओ क्लिपची फोडणी मिळाली होती.

गावडे आणि आदिवासी कल्याण संचालक दशरथ रेडकर यांच्यातील संभाषणाची ध्वनिफीत सार्वत्रिक झाल्यानंतर समाज माध्यमांवर त्याचे एकच पडसाद उमटू लागले होते.

त्यानंतर माजी मंत्री प्रकाश वेळीप यांनी या वादात उडी घेत तवडकरांवर गंभीर आरोप केले. अखेर आज शनिवारी गावडे यांनीच माझ्यासाठी तो विषय आता संपलाय, असे म्हणत वाद संपवण्याचा प्रयन्त केलाय.