Goa Shigmotsav 2024 : साखळी येथे २८ रोजी शिगमोत्सव शोभायात्रा, भरघोस बक्षिसे

Goa Shigmotsav 2024 :

साखळी, राज्यातील प्रमुख शहरात पर्यटन खाते भरवत असलेल्या शिगमोत्सव शोभायात्रांना राज्यात सुरवात झाली आहे.

२८ रोजी साखळी शहरात शिगमोत्सव शोभायात्रा होणार असून उद्‍घाटन सोहळा २७ रोजी संध्या. ४ वा. सरकारी सामाजिक आयोग केंद्राजवळ खास उभारण्यात येणाऱ्या व्यासपीठावर होणार आहे.

साखळी नगरपालिका व साखळी शिमगोत्सव समितीच्या सहकार्याने पर्यटन खात्याने आयोजित केलेल्या या शोभायात्रेत राज्यातील चित्ररथ, रोमटामेळ, लोककला पथके आदी सहभागी होतील, अशी माहिती आयोजन समितीचे प्रमुख तथा मुख्याधिकारी कबीर शिरगावकर यांनी पत्रकार परिषदेत दिली.

२७ रोजी होणाऱ्या उद्घाटन सोहळ्यास प्रमुख पाहुणे म्हणून लोककला कलाकार झिलू गावकर, हेल्थव्हेचे वरिष्ठ डॉ. मधुमोहन देसाई, मुख्याधिकारी कबीर शिरगावकर आदींची उपस्थिती असेल. त्यानंतर अखिल गोवा पातळीवर ८ ते १४ या वयोगटातील मुलांसाठी वेशभूषा स्पर्धा घेतली जाईल.

स्पर्धेनंतर "गरजतो मराठा" हा विशेष सांस्कृतिक कार्यक्रम होणार आहे. २८ रोजी संध्या. ४ वा. उत्तर गोवा जिल्हाधिकारी स्नेहा गिते व पोलिस उपअधिक्षक विश्वेश कर्पे यांच्या हस्ते श्रीफळ वाढवून शोभायात्रेला सुरवात होणार आहे. या शोभायात्रेत सहभागी होणारे चित्ररथ, रोमटामेळ, लोककला पथक तसेच वेषभूषा कलाकारांचे परिक्षण करून त्यांना बक्षीसे देण्यात येणार आहेत.

संध्या. ५ वाजेपर्यंत येणाऱ्या स्पर्धकांनाच शोभायात्रेत सहभागी करून घेण्यात येणार आहे. त्यानंतर येणाऱ्या स्पर्धकांना प्रवेश नाकारला जाणार आहे, असेही मुख्याधिकारी कबीर शिरगावकर यांनी सांगितले.

विविध स्पर्धा

राज्यस्तरीय चित्ररथ स्पर्धेतील विजेत्यांना प्रथम रू. ४५ हजार, द्वितीय रू. ३० हजार, तृतीय रू. २५ हजार, चौथे रू. २० हजार, पाचवे रू. १५ हजार, तर रू. ५ हजारांची २० उत्तेजनार्थ बक्षीसे दिली जाईल. रोमटामेळ स्पर्धेतील विजेत्यांना प्रथम रू. ३५ हजार, द्वितीय रू. २० हजार, तृतीय रू. १५ हजार, चौथे रू. १० हजार, पाचवे रू. ९ हजार, तर रू. ५ हजारांची ६ बक्षीसे दिली जाईल.

लोककला स्पर्धेतील विजेत्यांना प्रथम रू. १७ हजार, द्वितीय रू. १२५००/- तृतीय रू. १० हजार, चौथे रू. ८ हजार, पाचवे रू. ५ हजार तर रू. ४ हजारांची १० उत्तेजनार्थ बक्षीसे दिली जाईल.

खुला गट वेशभूषा स्पर्धेतील विजेत्यांना प्रथम रू. ४ हजार, द्वितीय रू. ३ हजार, तृतीय रू. २ हजार. ८ ते १४ वयोगटातील वेशभूषा स्पर्धेच्या विजेत्यांना प्रथम रू. १२००/-, द्वितीय रू. १०००/- व तृतीय रू. १५००/- अशी बक्षीसे दिली जातील.