Goa Accident: अपघात सत्र सुरूच, भरधाव कारने दोन दुचाकींना ठोकरले; महिला मृत्‍युमुखी

Goa Accident: साखळी-हाऊसिंग बोर्ड नजीक भरधाव कारने बुलेटसह अन्य एका दुचाकीला धडक दिल्‍याने पोस्तवाडा-होंडा येथील गिजीमोल नायर (45) या महिलेचा मृत्‍यू झाला; तर दोन दुचाकीस्‍वार जखमी झाले. हा अपघात मंगळवारी रात्री उशिरा झाला.

केए-01-एमएक्स-4113 या क्रमांकाची कार साखळीहून होंडाच्या दिशेने जात होती. बोर्ड येथे पोहोचताच बुलेटला जोरदार धडक बसली. त्‍यात बुलेटचालक अजितकुमार नायर आणि त्यांची पत्नी गिजीमोल हे रस्त्यावर पडले.

त्‍याचवेळी कारने पुढे जाऊन अन्‍य एका दुचाकीला धडक दिली. त्‍यात हुसेन आदम खान (रा. हरवळे) हे जखमी झाले. तिघांना साखळी इस्पितळात नेण्यात आले. गिजीमोल यांचा मृत्‍यू झाल्‍याचे डॉक्टरांनी जाहीर केले.

कारचालक युवकाला अटक

हवालदार प्रसाद बायेकर यांनी अपघाताचा पंचनामा केला. पोलिसांनी भारतीय दंड संहितेच्या 279, 337 आणि 304 (ए) या कलमान्वये गुन्हा दाखल करून बंगळुरू येथील कारचालक अखिलेश झांद्याला या युवकाला अटक केली.

पोलिस निरीक्षक राहुल नाईक यांच्या मार्गदर्शनाखाली पोलिस उपनिरीक्षक प्रसाद पाळणी पुढील तपास करीत आहेत.

दरम्यान सोमवारी मध्यरात्री पर्वरीत एका थार कारने दुचाकीला फरफटत नेल्याने दुचाकी चालकाचा मृत्यू झाल्याची घटना घडली होती. या अपघातात जखमी दुचाकी चालकाचा उपचारादरम्यान मृत्यू झाला होता. ही घटना ताजी असताना आज साखळी येथे घडलेल्या या दुर्दैवी घटनेमुळे हळहळ व्यक्त होत आहे