Goa Rain Updates: गोव्यात 27 नोव्हेंबरपर्यंत पावसाची शक्यता! येलो अलर्ट जारी

Goa Rain Updates: मॉन्सून परतून बरेच दिवस उलटून गेले असले तरी पुन्हा एकदा अवकाळी पावसाने राज्यात हजेरी लावली आहे. भारतीय हवामान विभागाने दिलेल्या माहितीनुसार 27 नोव्हेंबरपर्यंत जोरदार पाऊस होण्याची शक्यता असून येलो अलर्ट जारी करण्यात आला आहे.

माहितीनुसार, 1 ऑक्टोबरपासून आजअखेर 9.10 इंच पावसाची नोंद करण्यात आली आहे. यावेळी सरासरी 20 टक्के अधिक पाऊस झाला.

राज्यात पेडणे, सत्तरी आणि तिसवाडी तालुक्यांमध्ये काही ठिकाणी शुक्रवारी रात्री ढगांच्या प्रचंड गडगडाटासह जोरदार अवकाळी पाऊस पडला. सुमारे एक तास जोरदार पावसाने झोडपले. पेडण्यात रात्री पावसाचा जोर कमी झाला असला, तरी ढगांच्या गडगडाटासह पहाटे तीन वाजेपर्यंत पावसाची रिपरिप सुरू होती.

दरम्यान, सध्या सुरू असलेल्या आंतरराष्ट्रीय चित्रपट महोत्सवातही पावसाने एंट्री केली आणि सर्वांची धावपळ सुरू झाली. इफ्फीमध्ये आंतरराष्ट्रीय दर्जाचे चित्रपट पाहण्यासाठी जगभरातील सिनेरसिकांंनी हजेरी लावली आहे. यावेळी अचानक आलेल्या पावसामुळे एकच गोंधळ उडाला. यानंतर सर्वजण आडोसा शोधू लागले.