Goa Purple Fest: उत्साही वातावरणात ‘पर्पल फेस्ट’ला प्रारंभ

Goa: देशातला पहिला विविधतेचा तसेच सर्वसमावेशकतेचा सोहळा म्हणून उत्सुकता लागलेल्या पर्पल फेस्टला मान्यवरांच्या उपस्थितीत उत्साही वातावरणात सुरुवात झाली. आयनॉक्स परिसरात झालेल्या उद्‌घाटन सोहळ्यास गोवा राज्याचे मुख्यमंत्री डॉ. प्रमोद सावंत, केंद्रीय सामाजिक न्याय आणि सक्षमीकरण मंत्री डॉ. वीरेंद्र कुमार यांची प्रमुख उपस्थिती होती.

तसेच पर्यटनमंत्री रोहन खंवटे, समाजकल्याण मंत्री सुभाष फळदेसाई, समाजकल्याण खात्याचे सचिव सुभाष चंद्रा, पणजीचे नगराध्यक्ष रोहित मोन्सेरात, दिव्यांगजन आयुक्त गुरुप्रसाद पावसकर, राज्य समाजकल्याण संचालिका संध्या कामत आदी मान्यवरांची सन्माननीय उपस्थिती होती.

  ‘वुई केअर’ चित्रपट महोत्सवास मंत्री सुभाष फळदेसाई, सचिव ताहा हाजिक आणि क्युरेटर सतीश कपूर यांच्या उपस्थितीत सुरवात झाली. या तीन दिवसीय चित्रपट महोत्सवामध्ये 6,००० हून अधिक गोमंतकीय विद्यार्थी सहभागी होतील. फीट इन दि सँड, इम्पॉसिबल, नॅशनल अँथम इन साइन लँग्वेज, टायनी स्टेप आदी चित्रपटांचे प्रदर्शन करण्यात आले.

पर्पल एक्स्पिरियन झोनमध्ये दिव्यांग व्यक्तींसाठीचे विविध कक्ष उभारण्यात आले आहेत. यामध्ये दिव्यागांसह सर्वच लोकांचे सक्षमीकरण करण्याचा प्रयत्न आहे.

 यामध्ये फनडूक, फायदा, हेमोफिलिया सोसायटी गोवा, सेतू, समाज कल्याण कक्ष, आरोग्य कक्ष आणि जागृती मेळा असे विविध कक्ष आहेत. विविध संकल्पनांबाबत अधिक स्पष्ट आकलन घडवून आणण्याच्या उद्देशाने विविध कृती-उपक्रम राबविले जात आहेत.

राज्यात दिव्यांगजनांच्या कल्याणासाठी विविध उपक्रम राबविले जात आहेत. 80 टक्के दिव्यांगता असलेल्या व्यक्तीला मासिक 3,500 आणि इतर दिव्यांग व्यक्तीस मासिक 2,500 रुपये दिले जातात. दिव्यांग व्यक्तींसाठी आरक्षणाचे प्रमाणही अधिक आहे. राजधानी पणजी दिव्यांगप्रिय शहर बनविले आहे. - प्रमोद सावंत, मुख्यमंत्री