Cash For Job Scam: राज्याच्या राजकारणात नोकरी घोटाळा प्रकरण चांगलेच गाजत आहे. या घोटाळ्यातील मुख्य आरोपी पूजा नाईक नव-नवे खुलासे करत आहे. आता तिने थेट राज्याचे वीजमंत्री सुदिन ढवळीकर यांचे नाव घेतले. "मला मंत्री सुदिन ढवळीकर (Sudin Dhavalikar) यांनीच आयएएस अधिकारी निखिल देसाई आणि मुख्य अभियंता उत्तम पार्सेकर यांच्याशी समन्वय साधण्याचे निर्देश दिले होते." असा खुलासा पूजाने केला. तिच्या या खुलाशावर आता खुद्द ढवळीकरांनी प्रतिक्रिया दिली. "गोव्याची जनता मला ओळखते" असे ढवळीकर म्हणाले.
पूजा नाईकने दिलेल्या जबाबानुसार, मंत्री ढवळीकर यांच्या निर्देशानुसारच तिने आयएएस अधिकारी निखिल देसाई आणि मुख्य अभियंता उत्तम पार्सेकर यांना पैसे दिले होते. या स्फोटक आरोपानंतर ढवळीकर यांनी माध्यमांसमोर आपली प्रतिक्रिया दिली.
मंत्री सुदिन ढवळीकर म्हणाले, "गोव्याची जनता मला ओळखते. मी नेहमीच लोकांबरोबर सद्भावनेने आणि चांगुलपणाने व्यवहार केला आहे. पूजा नाईक जे काही आरोप करत आहे, त्यावर मी आता कोणतीही प्रतिक्रिया देणार नाही."
त्यांनी पुढे नमूद केले, "या प्रकरणाचा तपास गोवा पोलिसांचे दक्षता युनिट आणि गुन्हे शाखा करत आहे. पोलिसांना त्यांचा तपास पूर्ण करु द्या. चौदा दिवसांनंतर पोलिसांचा अहवाल आणि निष्कर्ष समोर येतील, त्यानंतरच मी यावर सविस्तर भाष्य करेन."
पूजा नाईकच्या आरोपांमध्ये तिची राजकीय पार्श्वभूमी किंवा कोणत्या कार्यालयात ती काम करत होती, याचा संदर्भ आला नव्हता, तरीही मंत्री ढवळीकर यांनी एक महत्त्वाचा मुद्दा स्पष्ट केला.
"पूजा नाईक हिने माझ्यावर आरोप केले असले तरी, तिची आणि मगोप (MGP) कार्यालयाची कोणतीही नोकरीविषयक संलग्नता नव्हती. ती माझ्या महाराष्ट्रवादी गोमंतक पक्षाच्या (MGP) कार्यालयात कधीही कर्मचारी म्हणून कार्यरत नव्हती," असे त्यांनी ठामपणे सांगितले.
याचवेळी, महाराष्ट्रवादी गोमंतक पक्षाचे अध्यक्ष दीपक ढवळीकर यांनीही पूजा नाईकच्या आरोपांवर पक्षाची भूमिका स्पष्ट केली. त्यांनी पूजा नाईकचा MGP कार्यालयाशी कोणताही संबंध नसल्याचे ठामपणे सांगितले.
दीपक ढवळीकर म्हणाले, "पूजा नाईक ही कधीही आमच्या मगोप (MGP) कार्यालयात कर्मचारी म्हणून कामावर नव्हती. तिची आमच्या कार्यालयात कोणतीही नोकरीविषयक संलग्नता नव्हती."
ते पुढे म्हणाले, "तिने जे काही व्यवहार किंवा गैरप्रकार केल्याचे आरोप केले आहेत, अशा प्रकारच्या कोणत्याही अवैध गतिविधी आमच्या कार्यालयात होत नाहीत. MGP हे एक शिस्तबद्ध आणि नैतिक मूल्यांवर आधारित पक्ष म्हणून कार्यरत आहे. त्यामुळे या आरोपांशी आमच्या कार्यालयाचा किंवा पक्षाचा कोणताही संबंध नाही."
ढवळीकरांनी घेतलेल्या या भूमिकेमुळे आता या प्रकरणाचा सर्व भार पुन्हा एकदा पोलीस आणि तपास यंत्रणांवर आला आहे. ढवळीकरांच्या दाव्यानुसार, त्यांनी पोलिसांच्या निष्कर्षांची वाट पाहण्याचा निर्णय घेतल्यामुळे पुढील दोन आठवडे गोवा पोलिसांच्या तपासाची दिशा आणि त्यात समोर येणारे पुरावे अत्यंत महत्त्वाचे ठरणार आहेत.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.