Protected Heritage Sites In Goa: राज्यात 51 संरक्षित वारसास्थळे

Protected Heritage Sites In Goa भारतीय पुरातत्व सर्वेक्षणाची एकूण 21 संरक्षित स्मारके आणि पुरातत्व संचालकांच्या अखत्यारितील 51 संरक्षित वारसास्थळे गोव्यात आहेत. नगरनियोजन विभागाने या वारसा घटकांचा तपशील ठेवला असल्याचे नगरनियोजन मंत्री विश्वजीत राणे यांनी सांगितले.

मडगावचे आमदार दिगंबर कामत यांनी नगरनियोजन मंत्री विश्वजीत राणे यांना गुरुवारी विधानसभेत अतारांकित प्रश्न विचारला होता की नगरनियोजन विभाग गोव्यातील वारसा स्थळे आणि स्मारकांची नोंद ठेवतो का?

त्यांच्या प्रश्नाला उत्तर देताना राणे म्हणाले की, भारतीय पुरातत्व सर्वेक्षणाची एकूण २१ संरक्षित स्मारके केंद्र सरकारच्या अखत्यारित येतात आणि ५१ संरक्षित वारसास्थळे गोव्याच्या पुरातत्व संचालनालयाच्या अंतर्गत येतात. गोव्यात ऐतिहासिक महत्त्व असलेल्या अनेक इमारती, वारसास्थळे आहेत.

भारतीय गोवा पुरातत्व सर्वेक्षणाला रिव्होल्युशनरी गोवन्स पार्टीकडून शहापूर-फोंडा येथील पुरातत्व स्थळाजवळील बिगरगोमंतकीयांच्या बेकायदेशीर झोपडपट्ट्यांसंदर्भात एक याचिका प्राप्त झाली आहे.

त्यांनी त्या बेकायदेशीर झोपडपट्ट्या पाडण्याची मागणी केली आहे. बेकायदेशीर झोपडपट्ट्या आणि बांदोडा गाव झोपडपट्टीमुक्त करणे हे यामागचे त्यांचे ध्येय असल्याचे राणे यांनी आपल्या उत्तरात नमूद केले आहे.