Goa Congress : गोवा प्रदेश काँग्रेसचे प्रभारी गोव्यात दाखल; प्रदेशाध्यक्ष अमित पाटकर यांनी केले स्वागत

Goa Congress : अखिल भारतीय काँग्रेस कमिटीचे गोवा प्रभारी मणिकम टागोर प्रथमच गोव्याच्या अधिकृत दौऱ्यावर आले आहेत. मंगळवारी त्यांचे गोव्यात आगमन झाले. यावेळी दाबोळी विमानतळावर गोवा काँग्रेसचे प्रदेशाध्यक्ष अमित पाटकर आणि इतर पदाधिकाऱ्यांनी त्यांचे स्वागत केले.

गोवा प्रदेश काँग्रेसच्या प्रभारीपदी अखिल भारतीय काँग्रेस समितीकडून मणिकम टागोर यांची नियुक्ती करण्यात आली आहे, असा आदेश अखिल भारतीय काँग्रेस समितीचे सरचिटणीस के.सी. वेणुगोपाल यांनी काढला होता. त्यामुळे दिनेश गुंडू राव यांना गोवा काँग्रेसच्या प्रभारीपदाच्या जबाबदारीतुन मुक्त करण्यात आले.

गोव्याच्या प्रभारीपदी असलेल्या दिनेश गुंडू राव यांना गोव्याच्या जबाबदारीतुन मुक्त करण्यात आले असले तरी तामिळनाडू आणि पुडुचेरीचे प्रभारी म्हणून ते राहणार आहे. तसेच माणिकराव ठाकरे यांना तेलंगणाच्या प्रभारीपदावर नियुक्त करण्यात आले आहे, असे आदेशात स्पष्ट करण्यात आले होते.