Porvorim Hit & Run Case: पर्वरी 'हिट अँड रन' प्रकरणी रशियन नागरिकाला अटक

Porvorim Hit & Run Case: 07 डिसेंबर रोजी पर्वरी आयसीआयसीआय बँकेच्या एटीएम जवळ ह्युंदाई कार आणि अॅक्टिव्हा स्कूटर यांच्या झालेल्या अपघाताप्रकरणी एक अपडेट हाती येतेय. या अपघातातील रशियन कार चालक दिमित्री कुतिन सायओ. (वय 20 वर्षे) याला पोलिसांनी अटक केलीय.

हा अपघात घडल्यावर कार चालकाने जखमी दुचाकीस्वाराला रुग्णालयात न नेता घटनास्थळावरून पलायन केले होते. पोलिसांनी बेदरकारपणे आणि निष्काळजीपणाने वाहन चालवल्या प्रकरणी IPC आणि MV कायद्याचे कलम- 134(A)(B) द्वारे गुन्हा नोंदवला असून सदर रशियन कार चालकाला अटक केलीय.

या प्रकरणी सविस्तर माहिती अशी की, राष्ट्रीय मार्गावरून म्हापसा येथे जाणाऱ्या रशियन कार चालक दिमित्री कुतिन सायओ याची अॅक्टिव्हा स्कूटर चालक हर्षल म्हापणकर याला जोरदार धडक बसली होती.

हा अपघात पर्वरी आयसीआयसीआय बँकेच्या एटीएमजवळ घडला होता. या धडकेने दुचाकी चालक हर्षल म्हापणकर रस्त्यावर पडून गंभीररीत्या जखमी झाला होता.

तसेच त्याच्या उजव्या पायाला दुखापत झाली होती. घटना घडताच कार चालकाने दुचाकीस्वाराला रुग्णालयात न नेता घटनास्थळावरून पळ काढला. अखेर आज 15 डिसेंबर रोजी त्याला कोरगाव- पेडणे येथे ताब्यात घेऊन अटक करण्यात आलीय.