लोकसभा निवडणुकीच्या पार्श्वभूमीवर निवडणूक यंत्रणा सतर्क झाली असून डिचोलीत सर्वत्र सुरक्षा व्यवस्था कडक करण्यात आली आहे. लोकसभा निवडणुकीच्या काळात गैरव्यवहार आणि अन्य बेकायदेशीर गोष्टी घडता कामा नये यासाठी निवडणूक आयोगाने कडक निर्बंध जारी केले असून सुरक्षा यंत्रणेला सतर्क राहण्याचे निर्देश दिले आहेत.
पोलिस आणि अन्य सुरक्षा यंत्रणेसह विक्री कर आणि अन्य सरकारी खात्यांच्या कर्मचाऱ्यांची विशेष नियुक्ती करण्यात आली आहे. डिचोली शहरातील छत्रपती शिवाजी महाराज सर्कलजवळ तात्पुरता नाका उभारण्यात आला असून या ठिकाणीही रात्रंदिवस वाहनांची तपासणी करण्यात येत आहे.
महाराष्ट्र आणि गोवा राज्याला जोडणाऱ्या दोडामार्ग येथील सीमेलगत सुरक्षा व्यवस्था कडक करण्यात आली आहे. दोडामार्ग येथे पोलिस, अबकारी आणि वाहतूक खात्याचे तपासणी नाके आहेत. तसेच विक्री कर खाते आणि कृषी खात्याचे तात्पुरते नाके उभारण्यात आले असून संबंधीत खात्याचे कर्मचारी तपासणीच्या कामात व्यस्त आहेत.
निवडणूक आयोगाने नियुक्त केलेले अधिकारी सुरक्षा व्यवस्थेवर नजर ठेवून आहेत. हे अधिकारी वेळोवेळी सुरक्षा व्यवस्थेचा आढावा घेत आहेत. पुढील काही दिवसांनी सुरक्षा यंत्रणा अधिक गतिमान होणार असल्याचे संकेत मिळाले आहेत.
वाहनांवर कडक नजर
दोडामार्ग येथे रात्रंदिवस सुरक्षा यंत्रणेकडून वाहनांची तपासणी करण्यात येत आहे. गोव्यातून महाराष्ट्रात जाणाऱ्या तसेच महाराष्ट्रातून गोव्यात येणाऱ्या वाहनांची पोलिस आणि अन्य सुरक्षा यंत्रणेकडून कसून तपासणी करण्यात येत आहे.
वाहनांमध्ये मद्य वा अन्य संशयास्पद वस्तू आहेत की नाहीत, त्याची खातरजमा केल्यानंतरच वाहने पुढे सोडण्यात येत आहेत. अजूनतरी सुरक्षा यंत्रणेच्या हाती संशयास्पद असे घबाड हाती लागलेले नाही.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.