कोंबड्या घेऊन आलेल्यांना लुटण्याचा प्रयत्न फसला

कळंगुट : गडहिंग्लज येथून ब्रॉयलर कोंबड्यांची गोव्यात डिलीव्हरी करण्यासाठी आलेल्या शिवराज पाटील व अन्य तिघांना दमदाटी करून त्यांचे वाहन घेऊन पळ काढलेल्या परशुराम कांबळे व त्याच्या सहकारी मित्रांना (सांगोल्डा) बारा तासाच्या आत मुद्देमाल तसेच वाहनासह ताब्यात घेण्यात साळगाव पोलिसांना यश आले आहे.

साळगाव पोलिस स्थानकाचे निरीक्षक सचिन लोकरे यांनी दिलेल्या माहितीनुसार, गडहिंग्लज येथील शिवराज पाटील आपल्या अन्य दोघा साथीदारांसह ब्रॉयलर कोंबड्यांची गाडी (क्र. KA-22 C-9320) घेऊन कळंगुटमध्ये डिलीव्हरी करण्यासाठी निघाले असता स्कूटरवरून त्यांचा पाठलाग करीत आलेल्या परशुराम कांबळे तसेच अजय देवुसकर (रा. सांगोल्डा) यांनी स्कूटर त्यांच्या जीपगाडी समोर आडवी घातली व खंडणीसाठी त्यांना दमदाटी करीत गाडीची चावी काढून घेतली. यावेळी गाडीचे चालक शिवराज पाटील तसेच संशयितांची बाचाबाची सुरू असतानाच जबरदस्तीने गाडीचा ताबा घेत परशुराम कांबळे व त्याच्या तिघाही साथीदारांनी तेथून पळ काढला.

याबाबत शिवराज पाटील व त्यांच्या अन्य तिघा साथीदारांनी साळगाव पोलिसात तक्रार दाखल केली. त्यानंतर साळगावचे पोलिस निरीक्षक सचिन लोकरे यांनी मोलेभाट साळगाव येथून परशुराम कांबळे याला ताब्यात घेतले तसेच चौकशीअंती कांबळे याचा अन्य एक साथीदार अजय देवूसकर याच्याही मुसक्या आवळण्यात यश मिळविले, तथापि तिसरा संशयित अद्याप सापडलेला नाही.