Goa Crime: गोव्यातील व्यापाऱ्याची 5 लाखाची फसवणूक; छत्तीसगडमधून भामट्याला केली अटक, एक फरार

Goa Police: गोव्यातील एका व्यावसायिकाची 5 लाख रुपयांची फसवणूक केल्याप्रकरणी गोवा पोलिसांनी बुधवारी छत्तीसगडमधून एकाला अटक केली आहे. तरूण भट्टाचार्य (वय ६३) असे संशयिताचे नाव आहे.

हे प्रकरण अनप्लग्ड मेटल वर्क्सचे मालक अभिलाष वेलिंगकर यांच्या तक्रारीशी संबंधित आहे. उत्तर गोव्याचे पोलिस अधीक्षक निधिन वाल्सन यांनी दिलेल्या माहितीनुसार, वेलिंगकर यांनी तक्रार दिली होती.

त्यांनी तक्रारीत म्हटले आहे की, छत्तीसगडस्थित भिलाई येथील दिव्यांसी एंटरप्रायझेस या कंपनीचे मालक अमित पांडे आणि प्रतिनिधी तरुण भट्टाचार्य यांच्यामार्फत त्यांना आगाऊ पेमेंटवर चार दिवसांत १३ लाख रुपयांपेक्षा जास्त किमतीचे स्टील देण्याचे वचन दिले होते.

त्यासाठी 5 लाख रुपये आगाऊ रक्कम घेतली होती. मात्री दीड महिना उलटून गेला तरी स्टील देखील दिले नाही आणि दिलेले पैसेही परत केले नाहीत. वेलिंगकर यांनी पैशासाठी तगादा लावल्यानंतर परतफेड म्हणून अडीच लाख रूपयांचे दोन धनादेश दिले गेले.

पण ते धनादेशही वटले नाहीत. त्यामुळे वेलिंगकर यांनी तक्रार दाखल केली होती. यानंतर पोलिसांनी भट्टाचार्य याला छत्तीसगडमधील घरातून ताब्यात घेतले. तर अमित पांडे फरार झाल्याचे समजते.

या कंपनीने लोहपोलाद पुरविण्याच्या बहाण्याने अनेक कंपन्या, व्यावसायिकांना गंडा घातल्याची शक्यता आहे.