पणजी: ज्यादा परतावा देण्याचे आश्‍वासन देऊन फॉरेक्स ट्रेडिंगच्या बहाण्याने पर्वरी येथील रहिवाशाला 35.64 लाखांचा गंडा घालणाऱ्या केरळमधील मलप्पूरम येथील 26 वर्षीय मोहम्मद हाजीश याला अटक केली. हा गुन्हा 16 ऑगस्टपूर्वी 2 टेलिग्राम खात्याद्वारे घडला होता. या गुन्ह्यामध्ये एकूण 1 कोटी 11 लाख रुपयांच्या रकमेसह संशयिताचे बँक खाते पाच वेगवेगळ्या राज्यांतील अशाच फसवणुकीशी जोडलेले असल्याने त्याचा शोध घेण्यात येत असल्याची माहिती सायबर गुन्हे कक्षाच्या पोलिसांनी दिली. पुढील तपास सायबर गुन्हे कक्षाच्या पोलिस करीत आहेत.
सायबर विभागाने दिलेल्या माहितीनुसार, या प्रकरणी पर्वरी येथील एका व्यक्तीने तक्रार दाखल केली आहे. त्यानुसार, 16 ऑगस्ट 2024 पूर्वी अज्ञात व्यक्तीने त्याच्याशी टेलिग्राम व सोशल मीडियाच्या इतर माध्यमांद्वारे संपर्क साधून त्यांना शेअर ट्रेडिंगमध्ये पैसे गुंतवल्यास जादा मोबदला देण्याचे आमिष दाखवले.
त्यानंतर तक्रारदाराला एक अॅप डाऊनलोड करण्यास लावले. त्या अॅपद्वारे तक्रारदाराला विविध बँकेच्या खात्यात पैसे जमा करण्यास भाग पाडले. काही काळानंतर संबंधित अॅपमधील तक्रारदाराचे खाते ब्लॉक करण्यात आले. याच दरम्यान फसवणूक होत असल्याचे लक्षात आल्यानंतर तक्रारदाराने सायबर विभागात धाव घेत आपली सुमारे 35.64 लाख रुपयांची फसवणूक झाल्याची तक्रार दाखल केली.
काही दिवसांपूर्वी, शेअर ट्रेडिंगमधून भरमसाट परतावा मिळवून देण्याचे आमिष दाखवून मुरगाव येथील एका महिलेची 1 कोटीची फसवणूक केल्याप्रकरणी सायबर गुन्हे विभागाने जॉन पीटर हुस्मान याला अटक केली होती. पीटरविरोधात भादंसंच्या कलम 419, 420 आणि माहिती व तंत्रज्ञान कायद्याच्या कलम 66 ‘डी’ अंतर्गत गुन्हा नोंदवण्यात आला होता. संशयित जॉन पीटर हुस्मान या नावाच्या इसमाने व्हॅट्सॲप आणि सोशल मीडियाच्या माध्यमांद्वारे संपर्क साधून महिलेला शेअर ट्रेडिंगमध्ये पैसे गुंतवल्यास त्यातून मोठा मोबदला देण्याचे आमिष दाखवले होते.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.