Goa Drugs Case: चरस बाळगल्याप्रकरणी हिमाचल प्रदेशच्या तरुणाला अटक; साडेचार लाख रुपयांचा ऐवज जप्त

Goa Police drugs arrest Kullu Himachal Pradesh Jawahar Singh

पणजी: गोवा पोलिसांच्या अंमलीपदार्थविरोधी कक्षाच्या पथकाने कुल्लू - हिमाचल प्रदेश येथील जवाहर सिंग जिबू याला मोरजी येथे अटक करून त्याच्याकडून ४५० ग्रॅम चरस जप्त केला. जप्त करण्यात आलेल्या या चरसची किंमत आंतरराष्ट्रीय बाजारपेठेत ४.५ लाख रुपये असल्याची माहिती पोलिस अधीक्षक टिकम सिंग वर्मा यांनी दिली.

पोलिसांनी दिलेल्या माहितीनुसार मोरजी येथील परिसरात हिमाचल प्रदेश येथील एक तरुण ड्रग्ज विक्री करण्यासाठी येणार असल्याची गुप्तचर पोलिसांकडून माहिती मिळाली होती. त्यानुसार या परिसरात साध्या वेशात पोलिसांचे पथक तैनात करण्यात आले होते.

मध्यरात्रीच्या सुमारास एक तरुण मोरजी येथे घुटमळत असताना आढळून आला. त्याला ताब्यात घेऊन त्याच्याकडे असलेल्या पिशवीची झडती घेण्यात आली. प्रथमदर्शनी त्याच्याकडे असलेला पदार्थ हा चरस असल्याचे ड्रग्ज कीट चाचणीत आढळून आला.